په کابل کې د ملګرو ملتونو د خوړو او کرنې سازمان استازي د کرنې، اوبولګولو او مالدارۍ وزارت له مرستیال سره په کتنه کې د افغانستان له کروندګرو سره د دغه سازمان د مرستو د دوام ډاډ ورکړ او زیاته یې کړه، چې د افغانستان د کرنې او مالدارۍ په برخه کې ملګري ملتونه په افغانستان کې د کرنې او مالدارۍ د پراختیا پلوي دي.

د پکتيکا ولايت په اورګون او يوسف خېلو ولسواليو کې د خلکو په مشرۍ د پراختيايي ادارې له لوري د ۱۱۴ ميليونه افغانيو په لګښت د ۹۱ بېلابېلو پروژو کار پيل شو.

د پکتيا ولايت د کليو او پراختيا رياست چارواکي وايي، چې د مرکز ګردېز ښار په بېلابېلو کليو کې د "UNOPS" په مالي مرسته د ۳۰ میلیونه او ۹۱۷ زره افغانيو په لګښت ۲۴ پروژې پيل شوې دي.

د میدان وردګ ولایت د کلیو او پراختیا ریاست سیمه ییز چارواکي وايي، د دغه ولایت په دوو ولسوالیو کې د څلور میلیونه ۶۳۴۳۷۹ افغانیو په ارزښت ۲۰ پرمختیايي پروژې بشپړې او ګټې اخیستنې ته وسپارل شوې.