قطر له افغان بی سرپرسته ښځو او ماشومانو سره مرسته کوي

افغان غږ خبری آژانس - کابل: د شهیدانو او معلولینو چارو وزارت مطبوعاتي دفتر څخه په خپره شوې خبرپاڼه کې راغلي چې د دغه وزارت مسلکي او تخنیکي مرستیال ملا عبدالرزاق اخند د قطر هېواد له سلاکار معروف القشوتي سره وکتل. 

 

د شهیدانو چارو وزارت تخنیکي مرستیال یتیمانو، کونډو او معلولینو ته د خدمتونو وړاندې کولو څرنګوالی ته په اشارې وویل، افغانستان د تېرو جګړو له امله له ګڼو ستونزو سره مخ دی او اړتیا ده چې په دې برخه کې د ټولنې هر اړخیز ملاتړ وشي.

 

په کابل کې د قطر سفارت ژمنه وکړه چې د دغو کسانو جزئیات او احصایې به د هېواد د سرې میاشتې له ټولنې سره شریکې کړي چې د یتیمانو، کونډو او معلولینو د ملاتړ په موخه به له دوی سره لازمې مرستې وکړي.

 

د يادونې وړ ده چې په هېواد کې د تېرو شلو کلونو جګړو بې شمېره ښځې او ماشومان بې سرپرسته ژوندي پرېښي دي.