موږ به په راتلونکي کې په افغانستان کې په سلګونو فابریکې پرانیزو

افغان غږ خبری آژانس - کابل: د پروان ولایت په مرکز چاریکار ښار کې د ۳ میلیونه ډالرو په پانګونې سره د روغتیایی فارما د تولید فابریکه په کار پیل وکړ.

د باختر آژانس د خبر له مخې، د صنعت او سوداګرۍ وزارت سرپرست نورالدین عزیزي د دغه نندارتون د پرانیستې په مراسمو کې وویل: موږ تمه لرو چې نور سوداګر هم راشي او په خپل هېواد کې پانګونه وکړي، چې د خپلو هېوادوالو لپاره د کار زمینه برابره کړي. نن ورځ د سوداګرو استحصال نشته او دوی ته په آزاده توګه د پانګونې مناسب فرصت دی.

هغه زیاته کړه، چې په راتلونکي کې به د سلګونو فابریکو د پرانېستلو شاهدان واوسو، چې زرګونه ځوانانو ته به د کار زمینه برابره شي.

عزيزي د ​​فابريکو خاوندانو ته ډاډ ورکړ، چې د برېښنا رسولو، د ځمکې تخصيص او نورو اسانتياوو ته يې جدي پاملرنه کړې ده.

 

 

 

په دې مراسمو کې د هولنس فارما فابریکې مشر عزیزالله عزیز وویل، چې په دې فابریکه درې میلیونه ډالره پانګونه شوې او په یوه دقیقه کې د ۶۰۰ ډایپرونو ظرفیت لري.

هغه زياته کړه، چې اوسمهال دغه فابريکه د باکيفيته صنايعو د توليد په برخه کې د ډايپرونو توليد کوي او ٢٠٠ کسانو ته يې د کار زمينه برابره کړې ده.

هغه وويل، د فابريکې د فعاليتونو د پراختيا لپاره پنځه جريبه ځمکې ته اړتيا ده او د برېښنا په برخه کې هم د اړوندو مسوولينو همکارۍ ته اړتيا ده.

 

د پروان ولايت د صنعت او سوداګرۍ رييس حافظ راز محمد ياسر هم د دې فابريکې د فعاليت د څرنګوالي په اړه معلومات ورکړل او ويې ويل: دغه فابريکه په لومړي پړاو کې د ډايپرونو د توليد په برخه کې فعاليت درلود او په راتلونکي کې به د نورو صنايعو په برخه کې هم فعاليت وکړي. محصولات

ياسر څرګنده کړه، چې اوسمهال په پروان کې په بېلابېلو سکتورونو کې شاوخوا ٣٠ توليدي او صنعتي فابريکې فعالې دي او له زرو څخه زيات کسان په کې په کار بوخت دي.

 

د پروان والي مفتي محمد ادریس انوري په خپلو خبرو کې وویل: اسلامي امارت امنیت تامین کړی او د پانګونې لپاره یې مناسب شرایط برابر کړي او اوس زموږ سوداګرو ته په بېلابېلو برخو کې د پانګونې زمینه برابره شوې ده.

نوموړي دغه راز پانګوالو ته ډاډ ورکړ، چې د پروان د سيمه ييزې ادارې رهبري به له دوى سره له هر ډول همکارۍ څخه ډډه وکړي او هيچا ته به اجازه ورنه کړي، چې د دوى د فابريکو د فعاليت مخه ونيسي.