د کانونو او پټرولیم وزارت د هرات په حوزه کې د نفتو د استخراج لپاره د کورنیو او بهرنیو شرکتونو د اسنادو د ارزونې بهیر پیل کړی او ډېر ژر به ګټونکی شرکت وټاکي.

په اسلام آباد کې د افغانستان سفارت اعلان کړی چې پاکستان د افغان سوداګرو د ۳۰۰ لاریو د ننوتلو مخه نیولې ده.

د فلسطین د روغتیا وزارت اعلان وکړ چې د اکتوبر له اوومې نیټې راهیسې په غزې تړانګه کښې د صهیونیسټ رژیم د جنایتونو د شهیدانو شمیر ۳۸۳۴۵ تنو ته رسیدلی دی.

د فلسطین د بندیانو کلب اعلان وکړ چې د صهیونیسټ رژیم له خوا د اکتوبر له اوومې نیټې څخه تراوسه ۹۶۲۵ تنه په لویدیځه غاړه کښې بندیان شوی دی.

د فواید عامې وزارت د روان کال له څلورمې څخه د سالنګ د لویې لارې د پاتې برخو د جوړولو کار پیل اعلان کړی او وايي، چې د کار له پیل وروسته به موټر چلوونکي د وزارت له لوري د ټاکل شوي وخت له مخې پر لویه لار تګ راتګ کوي.

د اسلامي امارت د لوړ پوړو چارواکو په حضور کې د ۲۵ میلیونه ډالرو په ارزښت د یوه کورني شرکت او یوه چینایي شرکت ترمنځ د ۱۰ زره ټنه پنبې د صادراتو تړون لاسلیک شو.

درې تنه انسان تښتوونکي په لښکرګاه ښارکې د پوليسو له خوا ونيول شول.

د کندهار چارواکي وايي، په تخته پل ولسوالۍ کې د ۵۰۰ زره امریکايي ډالرو په لګښت د اوبو د یوه بند د جوړېدو چارې پیل شوې.

د پروان د کرنې اوبولګولو او مالدارۍ ریاست مسوولین وايي چې له دغه ولایت څخه بهر ته هره ورځ لس ټنه زردالو صادرېږي.

په لوګر کې د جرګو او قبایلو چارو د همغږۍ معینیت له خوا ستره ولسي غونډه جوړه شوې وه چې په کې د سرحدونو قومونو او قبایلو چارو وزیر الحاج ملا نورالله نوري، د لوګر والي شیخ ضیاالرحمن مدني، د جرګو او قبایلو چارو د همغږۍ معین مولوي محمد علي جان احمد او ځینو سیمه ییزو مسوولینو ګډون کړی و.

د بهرنيو چارو وزارت سرپرست مولوي امیرخان متقي نن د افغانستان لپاره د ترکمنستان له سفیر خواجه عوضوف سره کتلې.

د ملي دفاع وزارت سرپرست مولوي محمد یعقوب مجاهد نن په خپل کاري دفتر کې د افغانستان لپاره د جاپان له سفیر تاکايوشي کورومايا سره کتلي دي.

د افغانستان د صنایعو او سوداګرۍ وزارت په پنجشیر ولایت کې د درې ورځو لپاره د زمردو د لومړنی نندارتون د پرانېستلو خبر ورکړ، ویې ویل چې د دغه نندارتون موخه د قیمتي او نیمه قیمتي ډبرو نندارې ته وړاندې کول دي، چې د صادراتو د پراختیا او د پانګوالو د جلبولو په موخه جوړ شوي دي. 

د تبیان د کلتوری او ټولنیزو فعالیتونو د مرکز مشر حجت الاسلام والمسلمین سید عیسی حسینی مزاری د ایران د اسلامی جمهوریت د موتلفه اسلامی ګوند له مشر ډاکټر اسدالله بادامچیان سره په کتنه کښې د ایران د وروستیو پرمختګونو په اړه بحث او خبرې اترې وکړې.

د باميان ولايت د اطلاعاتو او کلتور رياست وايي چې يوازې د لوې اختر په رخصتيو کې څه دپاسه سل زره سيلانيانو د دغه ولايت له طبيعي ځايونو څخه ليدنه کړې ده.

د کلیو د بیارغونې او پراختیا وزارت د کابل ولایت په خاک جبار او بګرامي ولسوالیو کې د اوبو رسولو د درېیو شبکو د جوړېدو خبر ورکوي او وايي چې د دغو شبکو په پرانیستلو سره سلګونه کورنۍ د څښاک له پاکو اوبو څخه برخمنې شوې دي.

د سوداګرو د اتحاديې استازو د رئیس الوزرا له سياسي مرستيال سره په کتنه کې وويل، چې د سرپرست حکومت د مسوولينو نږدې همکارۍ د دوى ستونزې هوارې کړې، د سوداګرۍ وده او په افغانستان کې د بهرنيو او کورنيو پانګونو د جلبولو لامل شوى دى.

د فلسطین د روغتیا وزارت اعلان وکړ چې صهیونیسټ رژیم په تیرو ۲۴ ساعتونو کښې څلور قتلونه وکړل چې په نتیجه کښې یې ۵۲ کسان شهیدان او ۲۰۸ نور ژوبل شول.

په کابل کې د ګرځندوی او طبي شرکتونو د مرکزي کمپلکس د پرانیستې په مراسمو کې د کورنیو چارو وزارت ویاند د هېواد اوسنی امنیت په تېرو څو لسیزو کې بې ساري وباله او ویې ویل، چې دولتي او خصوصي بنسټونه باید له دې کار څخه ډېره ګټه پورته کړي.

د یمن د وسله والو ځواکونو ویاند یحیی سریع اعلان وکړ چې په مکران سمندرګی او د عدن په خلیج کښې د امریکې او صهیونیسټ رژیم په څو بیړیو باندې د حملې خبر ورکړ.