لوستلو ته د هېوادوالو د هڅونې په موخه د اطلاعاتو او کلتور وزارت له خوا د کابل ښاروالۍ په همکارۍ په زرنګار پارک کې د کتابونو نندارتون د يوې اوونۍ لپاره پرانيستل شو. د کابل ښاروال ټولنيز او کلتوري مرستيال مولوي حبيب الرحمن منصور د دغه نندارتون د پرانيستې په مراسمو کې وويل، چې د هېواد ستونزې د "مطالعې" له لارې هوارېداى شي.

د بلخ سيمه ييز چارواکي په دغه ولايت کې د کتاب لوستلو اوونۍ د نمانځلو په ترڅ کې وايي چې د کتاب لوستلو اوونۍ نمانځل او د کتابونو نندارتونونه د ټولنې په ځانګړي ډول ځوانانو کې د لوستلو د کلتور په عامولو کې ګټور او اغېزمن دي.

د تخار ولایت سیمه ییزو چارواکو په دغه ولایت کې د کتاب د نړیوالې اونۍ په مناسبت د کتابونو نندارتون د پرانیستلو خبر ورکړ. په دغه نندارتون کې چې درې ورځې دوام کوي، څه باندې لس زره ټوکه کتابونه چې بېلابېل عنوانونه لري نندارې ته اېښودل شوي دي.