د بهرنیو چارو وزارت اداري مرستیال مولوي عبدالسلام حنفي د جاپان له سفیر سره په کتنه کې د افغانستان د کانونو په سکتور او استخراج کې د دغه هېواد د پانګونې غوښتنه وکړه.

د لوړو زده کړو وزارت سرپرست وزیر ندا محمد ندیم په کابل کې د جاپان له سفیر تاکاشي اوکاتا سره په کتنه کې له توکیو وغوښتل چې له افغانستان سره د تحصیلي او طبي موسسو د ودانیزو پروژو تر څنګ د تجربه لرونکو استادانو د روزنې او د تحصیلي بورسونو د ورکړې په برخه کې همکاري وکړي.

د اسلامي امارت ویاند تیره شپه (قوس ۱۶) اعلان وکړ چې په افغانستان کې د جاپان سفیر تاکاشي اوکاتا د سرپرست حکومت د رئیس الوزرا له سیاسي مرستیال مولوي عبدالکبیر سره وکتل. په دې کتنه کې د رئیس الوزرا سیاسي مرستيال د جايکا موسسي له خوا د زياتو پرمختيايي پروژو په عملي کولو ټينګار وکړ او له افغانستان سره يې د جاپان د بشري مرستو قدرداني وکړه.