د ایران د ملي امنیت شورا په ایران کې د اوکراین جګړې ته د پخوانیو افغان پوځیانو د استولو او ثبتولو اوازې رد کړې او د هغې خپرول یې د هغو رسنیو کار وباله چې د جعلي خبرونو په جوړولو مشهور دي. دغه راز په افغانستان کې د روسيې ځانګړي استازي هم په دې برخه کې د يوې پوښتنې په ځواب کې ويلي دي چې په "جعلي خبرونو" تبصره نه کوي.

د افغان پوځ د پخوانیو کومانډو ځواکونو د ځانګړو عملیاتو د قول اردو قوماندان وايي، د جګړې ښکېل هېوادونه هڅه کوي چې پخواني افغان کمانډو ځواکونه جذب کړي.