په سرپل ولایت کې د روغتون جوړول او د روغتیايي خدمتونو د کیفیت ښه کول

افغان غږ خبری آژانس - مزار شریف: د عامې روغتیا وزارت د روغتیا پالیسي او پراختیا وزیر ډاکټر محمد حسن غیاثي سرپل ولایت ته سفر وکړ او د دغه ولایت د روغتون چارې او د روغتیايي خدمتونو د وړاندې کولو لارې چارې یې وارزولې. په سرپل ولایت کې د نوي روغتون د جوړېدو لپاره دې یو مناسب ځای وټاکل شي او له بلې خوا خلکو ته د روغتیايي خدمتونو د وړاندې کولو په برخه کې دقیقه ارزونه وشي.

هغه زیاته کړه: د عامې روغتیا وزارت پریکړه کړې چې د سرپل ولایت په مرکز او نویو تاسیساتو کې د مجهزو روغتونونو د جوړولو په اړه اقدام وکړي او په دغو روغتیايي مرکزونو کې به د سیزرین په څانګو کې جراحان وګمارل شي.

ډاکټر غياثي وويل، په پلان کې لري چې د روغتيايي خدمتونو کيفيت لوړ کړي او يا هم د هېواد په ولايتي روغتونونو کې د زړه او پښتورګو د ناروغيو د درملنې په موخه سوپر تخصصي مرکزونه جوړ کړي.

له بلې خوا د سرپل والي مولوي محمد ظريف مظفر زياته کړه چې دغه ولايت غرنى دى او په واورو او بارانونو کې يې لارې بندې وي له همدې امله له ولسواليو څخه مرکز ته د ناروغانو ليږد له ګڼو خطرونو او ستونزو سره مخ دى. موږ غواړو چې دغو ستونزو ته پاملرنه وکړو، په ځینو ولسوالیو کې درمل، طبي وسایل او امبولانسونه برابر کړو.

د يادونې وړ ده، چې د عامې روغتيا وزارت د روغتيايي پاليسۍ او پراختيا وزير د سرپل ولايت له مسوولينو او خلکو سره ژمنه وکړه او ډاډ يې ورکړ، چې ډېر ژر به د دوى روغتيايي ستونزې هوارې شي.