مرستې د طبیعي پیښو قربانیانو ته "عادلانه" ویشل کیږي

افغان غږ خبری آژانس - کابل: له طبیعي پیښو سره د مبارزې وزارت ویاند محمد نسیم حقاني له افغان غږ خبری آژانس سره په مرکه کې وویل: مرستندویه بنسټونه او له طبیعي پیښو سره د مبارزې وزارت له سیلاب ځپلو او زیانمنو سره مرستې کړي دي. د وروستيو زلزلو او طبيعي پېښو له امله د هېواد په ځينو ولايتونو، ولسواليو او لرې پرتو سيمو کې مرستې روانې دي.
 
حقاني زياته کړه، چې د وروستيو طبيعي پېښو تر څنګ خلک له اقتصادي ستونزو سره لاس او ګرېوان دي، خو هغه کسان چې کورونه يې ويجاړ شوي نه دي، په مرستو کې نه دي شامل او په دې برخه کې د خلکو شکايتونه ډېر دي.
 
حقاني د مرستو د ويش د شفافيت په اړه وويل: لومړى د طبيعي پيښو له زيانمنو شويو سره مرستې کيږي او وروسته له پيښو سره د مبارزې وزارت د څيړنې ټيم سيمې ته ننوځي او مستحق کسان پيژني او له هغوى سره لازمې مرستې کوي.
 
حقاني په دوام وويل: موږ له نړيوالې ټولنې د لا زياتو مرستو غوښتنه وکړه. خو له بده مرغه تر اوسه لازمې مرستې نه دي شوي، په داسې حال کې چې د افغانستان اکثره خلک مرستو ته اړتیا لري.
 
یو له اړمنو کسانو څخه محمد صمیم افغان غږ خبری آژانس ته وویل: د مرستو ډېره برخه پر اړمنو کسانو نه وېشل کېږي او وکیلان یې پر خپلوانو او دوستانو وېشي.
 
 
نوموړي له اسلامي امارت څخه وغوښتل چې د مرستو په ویش کې سم مدیریت وکړي.
 
هغه دا هم وويل، چې له جمهوري رياست وروسته د کار د نشتوالي له امله بېوزلي او اړتياوې زياتې شوې او د خلکو اقتصادي حالت خراب شوى، خو که مرستې په منظم ډول ووېشل شي، بسنه کوي.
 
په همدې حال کې د کابل ښار د دیارلسمې ناحیې یو وکیل محمد ظاهر انوري وايي چې د مرستو د وېش لپاره لومړی لومړیتوب هغو کسانو ته ورکول کېږي چې ړانده، معیوب او کونډې دي او بیا هغو کسانو ته چې اولاد او وړتیا نه لري. کار کول او اړتیا ورته په پام کې نیول کیږي.
 
انوري زياته کړه: د نړيوالې ټولنې له خوا برابرې شوې مرستې کافي نه دي.
 
د انوري په وينا، د اړمنو کسانو شمېر زيات او مرستې کمې دي، نو له همدې امله ډېر اړمن کسان شکايت کوي.
 
نوموړي له نړيوالې ټولنې هم وغوښتل، چې خپلې مرستې زياتې کړي، ځکه دلته ډېر خلک اړ دي او خلک حتی د تېرېدو وکيلانو کورونو او دفترونو ته ورځي.
 
بايد يادونه وشي، چې پر افغانستان د اسلامي امارت له تسلط او د وروستيو طبيعي پېښو له رامنځته کېدو وروسته په هېواد کې د فقر او بېکارۍ کچه لوړه شوې او ګڼو هېوادوالو د هجرت لاره خپله کړې ده.