هرات ولایت کې د زعفرانو د ګل دریمه جشنواره نن دوشنبې پرانستل شوه.
په دغه جشنواره کې کروندګرو او هغو شرکتونو چې د زعفرانو د پروسس او صادراتو برخه کې فعالیت کوي، خپل تولیدات نندارې ته وړاندې کړل.
د هرات والي محمد اصف رحیمي چې دغه جشنواره کې یې ګډون کړی و، وویل هرات د هیواد په کچه د زعفرانو تر ټولو لوی تولیدوونکی ولایت دی.
والي وویل لس کاله وړاندې د زعفرانو کښت له یوې ولسوالۍ پيل شو او نن ورځ زرګونه خلک په دې برخه کې فعالیت کوي.
هرات د هیواد په لویدیځ کې هغه ولایت دی چې زیات شمیر بزګران یې د زعفرانو په کښت او تولید بوخت دي.
د افغانستان زعفران د نړۍ په هیوادونو کې ښه نوم لري.
سرچينه : د صدای افغان خبری آژانس(آو)
