افغان غږ خبری آژانس: د پاکستان صدراعظم شهباز شریف د چهارشنبې په ورځ وویل چې پاکستاني طالبان له افغانستانه خپل بریدونه تنظیموي.
شریف د خیبر پښتونخوا په ګډون د پاکستان په مختلفو برخو کې د دې ډلې وروستیو بریدونو ته په اشارې سره وویل، "له افغانستان څخه د پاکستاني طالبانو د وسله والو بریدونو پلان له چا پټ نه دی."
شریف په پاکستان کې د ترهګرۍ پر وړاندې پر مبارزې ټینګار وکړ او ویې ویل، "په پاکستان کې د ترهګرۍ لپاره هېڅ ځای نشته او د دې د ختمولو وخت رارسېدلی دی."
په همدې حال کې د پوځ لوی درستیز فصیح الدین فطرت د چهارشنبې په ورځ یوې خبري غونډې ته وویل چې پاکستاني طالبان د افغانستان په خاوره کې حضور نه لري.
د يادونې وړ ده، چې پاکستاني چارواکو تر دې وړاندې هم څو ځلې ورته تورونه لګولي، خو د اسلامي امارت له لوري دغه څرګندونې رد شوې دي.