افغان غږ خبری آژانس: د هرات د ښاروال مرستیال مولوي جلال الدین حقدوست وايي، د هرات ښار په لسمه او څوارلسمه ناحیه کې د سړکونو پخولو او د دوه کیلومترو په اوږدوالي د څاګانو کیندل پروژه بشپړه او ګټې اخیستنې ته وسپارل شوه.
د هرات ښاروال د پروژې له بشپړېدو څخه د خوښۍ په څرګندولو سره د ښاروالۍ د ټولو پرمختیايي پروژو د کار د کیفیت په اړه د هرات ښاریانو ته ډاډ ورکړ.
په همدې حال کې د اړوندو سيمو اوسېدونکو د دغې پروژې له بشپړېدو څخه د خوښۍ څرګندولو په ترڅ کې د ښار د پراختيا په برخه کې د هرات ښاروالۍ فعاليتونه او لاسته راوړنې د قدر وړ وبللې او يو ځل بيا يې د دغه رياست له ټولو پروګرامونو څخه خپل بشپړ ملاتړ اعلان کړ.
دغه پروژه په شپږو میاشتو کې بشپړه او عملي بڼه خپله کړه.