د افغانستان د سوداګرۍ او صنایعو وزارت وايي چې د دغه وزارت سرپرست د استانبول د هلال په څنډه کې د ترکیې د سوداګرۍ له وزیر سره په کتنه کې د دواړو هېوادونو ترمنځ د تخنیکي، اقتصادي او سوداګریزو اړیکو د کمېټو د جوړولو په اړه هوکړې ته رسېدلي دي.
دخپریدو نیټه :پنجشنبه ۸ قوس ۱۴۰۳ ساعت ۱۵:۲۴
د مطلب کود : 301481
افغان غږ خبری آژانس – کابل: د صنعت او سوداګرۍ وزارت مطبوعاتي دفتر نن (پنجشنبه د قوس ۸ مه) د یوې خبرپاڼې په خپرولو سره ویلي چې د دغه وزارت سرپرست نورالدین عزیزي به د ترکیې جمهوریت ته خپل سفر ته دوام ورکړي. د هغه هېواد په رسمي بلنه او د ۲۰۲۴ کال د استانبول د حلال نړیوال نندارتون د پرانستلو په څنډه کې یې د ترکیې جمهوریت د سوداګرۍ له وزیر عمر بلات سره وکتل.
په دې کتنه کې د اسلامي امارت د صنایعو او سوداګرۍ وزارت سرپرست له ښاغلي بولات څخه په دغه نندارتون کې د افغان پلاوي د بلنې له امله مننه وکړه.
له بلې خوا د ترکیې جمهوریت د سوداګرۍ وزیر د عزیزي په مشرۍ د اسلامي امارت د پلاوي د شتون هرکلی وکړ او د دواړو هېوادونو ترمنځ یې د لا زیاتو همکاریو هیله څرګنده کړه.
د جمهور آژانس د خبر له مخې دواړو لورو د اسلامي امارت او ترکیې د دولتي پلاوي او خصوصي سکتور د لیدنو کتنو یادونه وکړه او دغه سفرونه یې د دواړو هېوادونو ترمنځ د سوداګرۍ د زیاتوالي او پراختیا بنسټ او پیژندنه وبلله.
د دغې غونډې په پای کې دواړو لورو په دواړو هېوادونو کې د لا زیاتو ناستو او نندارتونونو پر جوړولو د ټینګار ترڅنګ د تخنیکي او ارتباطي کمېټې د جوړولو پرېکړه وکړه او دغه کمېټې اړ دي چې ستونزې، ننګونې او فرصتونه په ګوته او د حل مناسبو لارو په لټه کې شي.
avapress.net/vdcc4sq1s2bqx08.5ja2.html
