افغان غږ خبری آژانس - کابل: د متحده عربي اماراتو د بهرنیو چارو وزارت د افغانستان د سفارت پخوانی مامور بدرالدین حقاني په دغه هېواد کې د اسلامي امارت د سفیر په توګه منلی دی.
د دغه وزارت د پروتوکول مرستیال سیف عبدالله الشامسي د بدرالدین حقاني باورلیک منلی دی.
د اسلامي امارت د بهرنیو چارو وزارت هم تایید کړې، چې مولوي بدرالدین حقاني په متحده عربي اماراتو کې د افغانستان د سفیر په توګه ټاکل شوی او نن یې خپل باورلیک د متحده عربي اماراتو د بهرنیو چارو مرستیال وزیر ته وسپاره.
تر دې مخکې د ازبکستان لومړي وزیر اعلان کړی و چې هېواد به یې ډېر ژر د اسلامي امارت سفیر ور وبولي.
چین هم د اسلامي امارت د سفیر باورلیک منلی دی.