د روسیې او افغانستان ترمنځ د سوداګریزو راکړو ورکړو زیاتوالی

افغان غږ خبری آژانس - کابل: په افغانستان کې د روسیې سفیر دیمیتري ژیرنوف وايي، د نفتو د تولید په برخه کې د مسکو او کابل ترمنځ همکاري له پخوا پیل شوې او دوام به ولري.

د روسیې سفیر د خوراکي توکو د خوندیتوب او د نفتي توکو د عرضې په برخه کې له روسیې سره د همکارۍ په اړه د اسلامي امارت د چارواکو څرګندونو ته په اشارې سره ټینګار وکړ: دا همکاري په چټکۍ سره پراختیا مومي.

د روسیې د تاس خبري اژانس د راپور له مخې، په افغانستان کې د روسیې د ډیپلوماتیک ماموریت مشر یادونه وکړه چې دوه اړخیزه سوداګریزه راکړه ورکړه څو برابره زیاته شوې ده.

هغه زیاته کړه: د دغو دوو هیوادونو همکاري په اساسي توګه د غنمو، اوړو، د سونګ موادو لکه تیلو، د موټرو تیلو او د کیروسین د رسولو په برخه کې ده.

تر دې مخکې په افغانستان کې د روسیې د سوداګرۍ د مرکز مشر رستم خطیبولین اعلان کړی و چې د اسلامي امارت له واک ته رسېدو وروسته د روسیې او افغانستان ترمنځ سوداګریزې راکړې ورکړې د پام وړ زیاتې شوې دي.

هغه وویل، چې په ۲۰۲۲ کال کې د افغانستان او روسیې ترمنځ سوداګري څه باندې ۱۷۰ میلیونه ډالره وه، خو سږ کال دا کچه یو میلیارد ډالرو ته لوړه شوې ده.

د هغه په ​​وينا، د روسيې او افغانستان تر منځ د سوداګرۍ په عمده برخو کې ګاز، د نفتو محصولات، اوړه او غنم او همدارنګه لبنيات شامل دي.