د آمو سیند د نفتو له ساحې څخه د ورځې ۱۱۰۰ ټنو ته د نفتو استخراج

افغان غږ خبری آژانس - کابل: د کانونو او پټرولیم وزارت ویاند همایون افغان د افغان غږ خبری آژانس له خبریال سره په مرکه کې ویلی چې د امو بحیرې د نفتو د استخراج کچه د پخوا په پرتله د پام وړ لوړه شوې ده.

 

د ښاغلي افغان په وینا اوس مهال د امو بحیرې د نفتو په ساحه کې د نفتو د استخراج ۱۸ څاګانې شتون لري چې له هغې څخه هره ورځ ۱۱ ټنه تېل استخراجېږي.

 

د کانونو او پټروليم وزارت وياند زياته کړه، چې په دې سيمه کې د يو شمېر نورو څاګانو د کيندلو کار روان دى او د کار په بشپړېدو سره به له دې سيمې څخه د نفتو د استخراج کچه لوړه شي.

 

د کانونو وزارت ویاند همداراز ډاډ ورکړ چې د امو بحیرې د نفتو له حوزې څخه د نفتو او نفتو استخراج په دې برخه کې د افغانستان د اقتصاد د ودې او پر ځان بسیا کېدو کې اغېزمن دی.

 

د کانونو او پټرولیم وزارت دغه چارواکي دا هم وویل چې چینايي شرکت د نفتو د نورو څاګانو د کیندلو کار پیل کړی چې ډېر ژر به بشپړ شي.

 

په همدې حال کې د افغانستان اسلامي امارت په دې وروستیو کې د امو سمندرګي له یوې چینايي کمپنۍ سره د نفتو د استخراج تړون لاسلیک کړ.

 

د دغه قرارداد له مخې به په افغانستان کې د نفتو او نفتي توکو پروسس کېږي او د دغه قرارداد د شرایطو له مخې قراردادي شرکت په لومړي کال کې ۱۵۰ میلیونه ډالره پانګونه کوي.

 

د تړون له مخې به په راتلونکو درېیو کلونو کې ټوله پانګونه ۵۴۰ میلیونه ډالرو ته ورسېږي. دغه راز ویل شوي چې په دې پروژه کې ۳۰۰۰ تنو ته د کار زمینه هم برابره شوې ده.

 

د يادونې وړ ده، چې د امو بحيرې له نفتي حوزې څخه د نفتو د استخراج پروسه د روان کال د سرطان په مياشت کې په رسمي ډول پيل شوه.