د ازبکستان ولسمشر په سیمه ییزو غونډو کې د افغانستان د ګډون غوښتنه وکړه

افغان غږ خبری آژانس: د ازبکستان جمهور رئیس شوکت میرضیایف په تاشکند کې د اقتصادي همکاریو د سازمان په شپاړسمه غونډه کې په خپله وینا کې له افغانستان څخه وغوښتل چې د سیمه ییز ادغام په بهیر کې شامل شي.

 

هغه څرګنده کړه: زه غواړم ستاسو پام دې حقیقت ته راواړوم چې نننۍ غونډه به د افغانستان له ګډون پرته چې زموږ د سازمان یو غړی وي ترسره شي. هغه وویل چې د سیمه ایز ادغام په بهیرونو کې د هیواد فعاله ونډه زموږ د پایداره پرمختګ لپاره یو اړین شرط دی.

 

هغه له نړيوالې ټولنې هم وغوښتل چې د افغانستان له خلکو سره بشري مرستې زياتې کړي او په هېواد کې ټولنيزې-اقتصادي ستونزې هوارې کړي.

 

په همدې حال کې د ازبکستان د ولسمشر مطبوعاتي سکرتر شیرزاد اسدوف ویلي، چې په دې غونډه کې د اسلامي امارت استازي نه دي بلل شوي، ځکه د افغانستان اوسنی موقت حکومت د نړیوالې ټولنې له خوا په رسمیت نه دی پیژندل شوی.

 

له بلې خوا د اسلامي امارت ویاند ذبیح الله مجاهد له رسنیو سره په خبرو کې ویلي، چې په تاشکند کې د اقتصادي همکاریو د سازمان غونډې ته چې دوه ورځې وړاندې جوړه شوې وه، د افغانستان استازي باید وربلل شوي وای.

 

هغه زیاته کړه: دا غونډه باید د اقتصادی اصولو پر بنسټ جوړه شوی وی نه سیاسی. له بده مرغه اسلامي امارت ته د ګډون اجازه ورنکړل شوه. په داسې حال کې چې په سرمشریزه کې زموږ د استازو شتون دا پیښه نوره هم اغیزمنه کړه.

 

د ایرنا د راپور له مخې د سوداګرۍ وزارت مرستیال عبداللطیف نظری هم وویل: اسلامی امارت له ګاونډیو او سیمې سره د اقتصادی او تجارتی اړیکو پراختیا ته ژمن دی. له همدې امله په تاشکند کې د اقتصادي همکاریو د سازمان په غونډه کې د سیمې په کچه د اقتصادي او سوداګریزو اړیکو د پراخولو هڅې وشوې.

 

د اقتصادي همکاریو سازمان (ECO) یو سیمه ییز بین الحکومتي اقتصادي جوړښت دی چې د ایران اسلامي جمهوریت، اذربایجان جمهوریت، افغانستان، قزاقستان، قرغزستان، پاکستان، تاجکستان، ترکمنستان، ترکیه او ازبکستان په کې شامل دي. دا سازمان په ۱۹۸۵ کال کې د ایران، پاکستان او ترکیې له خوا تاسیس شو او دایمي دارالانشا مرکز یې په تهران کې دی.