د جرمني مقاماتو یو افغان په دې تور نیولی دی چې د طالبانو غړی و او د یو افغان پولیس په وژنه کې یې رول درلودلی دی.
د صدای افغان خبری آژانس(افغان غږ خبری آژانس)، د جرمني فدرالي څارنوالانو د سه شنبې په ورځ وویل چې دغه شخص "امید. ن" نومیږي، شل کلن دی او د جمعې په ورځ نیول شوی دی.
امید، په دې تورن دی چې په ۲۰۱۳ کال او یا له هغه دمخه د طالبانو سره یوځای شوی او د هغې ډلې لپاره یې جلب او جذب کړی دی.
جرمني څارنوالان وایي چې امید د ٢٠١٣ کال په لومړیو کې یو افغان پولیس په ونې پورې تړلی و او له شکنجې، وهلو ټکولو وروسته یې هغه د وسلې په ډزو وژلی دی.
جرمني مقاماتو همداشان ویلي دي چې امید ته وظیفه ورکړل شوی وه چې بمونه کیږدي خو څرنگه چې دې کار ته تیار نه و، د ایران او ترکیې له لارې اروپا ته تښتیدلی دی او د ٢٠١٣ کال په نوامبر کې جرمني ته رسیدلی دی.
څو ورځې دمخه د جرمني د شپیگل مجلې هم رپوټ ورکړی و چې په څو تیرو کلونو کې د طالبانو د ډلې په زرگونو غړي هم د افغان مهاجرو په منځ کې جرمني ته ورغلي دي.
دخپریدو نیټه :چهارشنبه ۳ جوزا ۱۳۹۶ ساعت ۰۸:۳۰
د مطلب کود : 143517
سرچينه : د صدای افغان خبری آژانس(آوا)
avapress.net/vdcgqw9quak9tn4.1gra.html
ډیری لیدل شوي
