بادغیس کې د طالبانو له خوا درې تښتول شوي انجنیران پرون خوشې شول

په بادغيس ولايت کې درې انجنيران او د هغوي موټر چلوونکې، چې وسله والو طالبانو تښتولي ول، له لسو ورځو وروسته پرون مازديګر خوشې شول.

د بادغيس امنيه قومندان سمونوال عبدالجبار صالح ازادۍ راډيو ته وويل، چې دا انجنيران په مقر ولسوالۍ کې د پستې د ځنګله د سروې په مهال د وسله والو مخالفانو له لوري تښتول شوي ول.

قومندان صالح د دغو انجنيرانو په خلاصون کې د ولسي مشرانو رول مهم وباله، خو په عين حال کې يې له موسسو وغوښتل چې له پوليسو سره له هماهنګۍ پرته ناامنو سيمو ته کارکوونکې ونه لېږي.