په جوزجان ولايت کې د اوبو رسولو د دوو شبکو د جوړولو کار پيل شو

افغان غږ خبری آژانس - مزارشریف: د جوزجان والي قاري ګل حیدر شفق د دغو پروژو د پیل په مراسمو کې وویل: د اسلامي امارت حکومت د خلکو هیلو ته په پام او جدي توګه کار کوي. 

په ورته وخت کې د جوزجان ولایت د کلیو د بیارغونې او پراختیا رئیس مولوي اسدالله حمزه هم وویل: د ۱۲،۶ میلیونه افغانیو په ارزښت د ګلستان په کلي او د شبرغان ښار د ولایتي روغتون د اوبو رسولو د دوو شبکو د جوړولو چارې پیل شوې. د هغه په ​​وينا، د دغو پروژو د جوړولو لګښت د کورنيو او بهرنيو بنسټونو او ځايي خلکو له خوا ورکول کېږي.

ده زياته کړه: په ګلستان کلي کې څه دپاسه ٤٠٠ کورنۍ ژوند کوي چې دڅښاک د پاکو اوبو له ستونزې سره مخ دي او د اوبو رسولو د شبکې په جوړولو سره به ددغو کورنيو اړتياوې پوره شي . د هغه په ​​وينا، د اوبو رسولو د شبکې په جوړېدو سره به په دغه ٢٠٠ بستريز ولايتي روغتون کې څه باندې پنځه زره کسان اوبو ته لاسرسى ولري.

مولوي حمزه زياته کړه، چې په دغو پروژو کې د ٦٠ او ٨٠ مترو په اوږدوالي د دوو ژورو څاګانو کيندل، د اوبو د دوو زيرمو جوړول او د کور د اوبو د شبکې جوړول شامل دي او چارې به يې په څلورو کلونو کې بشپړې شي.

له بلې خوا د شبرغان ښار يو شمېر ښاريان وايي: د څښاک د پاکو اوبو نشتوالى د ګلستان د کلي د اوسېدونکو او د جوزجان د ولايتي روغتون د مراجعينو له ستونزو څخه دى او د دغو پروژو په جوړېدو سره به ٨٠ سلنه ستونزې هوارې شي.

د يادونې وړ ده، چې جوزجان د هېواد يو له شمالي ولايتونو څخه دى، چې پرله پسې وچکالۍ او د څښاک د صحي اوبو نشتوالي يې اوسېدونکي ستړي کړي دي.

په دې وروستیو کې د حضرت آیت الله سیستانی (حفظه الله) دفتر په بیړنی اقدام سره د دغه ولایت ځینو کلیو ته د څښاک د پاکو اوبو ټانکرونه لیږل شوي.