د نړۍ د صنعتي قدرتونو کړنو چاپېریال د تباهۍ له خطر سره مخ کړی دی/ دا قدرتونه باید له اغېزمنو هېوادونو سره مرسته وکړي

افغان غږ خبری آژانس - کابل: د اسلامي امارت د چاپېریال ساتنې ملي ادارې پرون چهارشنبه (د جوزا ۱۶ مه) د چاپېریال ساتنې د نړیوالې ورځې د نمانځلو په موخه د «زموږ خاوره، زموږ راتلونکی» تر سرلیک لاندې غونډه وکړه. 

په دې کتنه کې  دجمهور رييس  دمرستيال دفتر اداري مرستيال مولوي عبدالسلام حنفي وويل چې په تيرو کلونو کې  چاپيريال ساتنې ته زياته پاملرنه شوې ده .

ده په دې خبرې سره چې په لويديځ كې له صنعتي انقلاب وروسته چاپيريال له خطر سره مخامخ شوى، زياته كړه چې د نړۍ د صنعتي قدرتونو د بې حده ګټه پورته كولو له كبله چاپيريال تر بل هر وخت زيات د تباهۍ له خطر سره مخامخ دى.

د اسلامي امارت د لومړي وزیر د دفتر اداري مرستیال زیاتوي چې د خاورې، اوبو او هوا ککړتیا چاپېریال ګواښي.

نوموړي افغانستان د نړۍ په کچه د اقلیم د بدلون او د چاپېریال د ککړتیا له امله د ډېرو زیان منونکو هېوادونو په توګه یاد کړ او ویې ویل چې په هېواد کې سیلابونه او زلزلې د اقلیم د بدلون پایله ده.

مولوي حنفي په هېواد کې د چاپېريال د ککړتيا لاملونه په تېرو کلونو کې د شنو ساحو بدلېدل، د ځنګلونو وهل، د اوبو د مديريت نشتوالى او په تېرو کلونو کې د غاصبينو له خوا د ويجاړونکو وسلو کارول په ګوته کړل.

د اسلامي امارت دغه چارواکي سالم چاپيريال د ټولو انسانانو طبيعي حق وباله او ويې ويل چې د سالم چاپيريال د لرلو لپاره بايد د ټولنې ټول وګړي په مسوولانه ډول عمل وکړي.

نوموړي د رسنيو، علماوو او د پوهنې رياست له مسوولينو وغوښتل، چې د چاپېريال ساتنې په برخه کې د خلکو د پوهاوي په برخه کې هڅې وکړي.

د لرئیس الوزرا اداري مرستيال د نړۍ د هغو صنعتي هېوادونو ونډه چې د شنو خونو ګازونه توليدوي د افغانستان په ګډون د اقليمي بدلون له اغېزمنو هېوادونو سره مرسته و ارزوله او زياته يې کړه چې افغانستان د شنو خونو ګازونو په توليد کې ونډه نه لري.

هغه وویل، د چاپېریال ککړتیا د مخنیوي په موخه د هېواد په ۳۴ ولایتونو کې د چک بندونو جوړول، د نیالګیو کېنولو د پلانونو تطبیق او د کرنیزو ځمکو بیارغونه د اسلامي امارت له هڅو څخه دي.

مولوي حنفي وویل، اسلامي امارت په خپلو ټولو امکاناتو سره د چاپیریال د ککړتیا د مخنیوي هڅه کوي او له هیوادوالو یې وغوښتل چې د چاپیریال په ساتنه کې خپله ونډه ترسره کړي.

هغه وويل: "هغه صنعتي هېوادونه چې د شنو خونو د ګازو په توليد کې لويه ونډه لري او د شنو خونو د ګازو منفي اغېزې نورو هېوادونو په ځانګړې توګه افغانستان ته رسېږي، اخلاقي مسووليت لري چې له موږ سره همکاري وکړي."

د رئیس الوزرا اداري مرستيال د نړيوالې ټولنې له خوا نړيوالو غونډو ته د افغانستان د چاپيريال ساتنې د ملي ادارې د مسوولينو پر بلنې ټينګار وکړ او زياته يې کړه چې په دغو غونډو کې به افغان چارواکي د هېواد د چاپيريال ساتنې ستونزې د نړۍ تر غوږونو ورسوي.