په ۲۰۲۳ کال کې د شاوخوا دوه میلیارده ډالرو په ارزښت توکي صادر شوي دي

افغان غږ خبری آژانس - کابل: د افغانستان د صنایعو او سوداګرۍ وزارت ویاند عبدالسلام اخندزاده جواد د دوشنبې په ورځ (جدی ۱۱) د افغان غږ خبری آژانس خبریال ته وویل چې افغانستان په ۲۰۲۳ کال کې د ۱،۹ میلیارد ډالرو په ارزښت توکي صادر کړي دي.

هغه زياته کړه، چې دغه شمېره د سالنګ د لويې لارې د بيارغونې، د ډبرو سکرو په صادراتو کې د کمښت او ګاونډيو هېوادونو ته د ځينو ستونزو د شتون له امله ده.

د جواد د څرګندونو پر بنسټ؛ په ۲۰۲۳ کال کې افغانستان د ۲۰۲۲ کال په پرتله شاوخوا ۴۱ میلیونه ډالره (۲ سلنه) صادرات زیات کړي دي.

د صنايعو او سوداګرۍ وزارت وياند وويل، چې د صادراتو په کچه کې ٤١ ميليونه ډالره زياتوالى د ځينو کرنيزو محصولاتو، پنبه، وچې انځر او مڼو د صادراتو د زياتوالي له امله دى.

جواد همداراز وویل، که څه هم پاکستان، ازبکستان او تاجکستان ته د افغانستان صادرات کم شوي دي. خو هند، چین او قزاقستان ته دا زیاتوالی راغلی چې د صادراتو لپاره د بالقوه بازارونو له نظره مثبت ګڼل کېږي.

هغه په ​​ډاګه کړه، چې د افغانستان د صادراتو د راتلونکي لپاره سږني پلانونه سترې لاسته راوړنې دي، چې په راتلونکو کلونو کې د صادراتو د زیاتوالي په برخه کې اغېزمن تمامېدای شي.

هغه د صادراتو د پروسس زونونو رامنځته کول، د صادراتو د ارقامو د راټولولو مرکز، د صادراتو د اسنادو په پړاوونو کې د واحد مرکز جوړول، د صادراتو د ودې د پروژې د بیا احیا او د صادراتو د ودې سره سم د کار کولو په موخه د بشري منابعو د زیاتوالي یادونه وکړه. 

په همدې حال کې د سوداګرۍ او صنایعو خونې د پلاوي غړي خانجان الکوزي د افغان غږ خبری آژانس خبریال ته وویل چې اسلامي امارت صادراتو ته لومړیتوب ورکوي او په ګمرکونو کې یې د صادراتو لپاره ځانګړې پالیسي جوړه کړې ده.

الکوزي زياته کړه، چې په بندرونو او پولو دواړو کې په لومړي ګام کې د صادراتي توکو بار موټر له قدمونو تېرېږي او ورپسې نور موټرونه تېرېږي.

خو سوداګر ټینګار کوي، چې هوايي دهلېزونه باید فعاله شي، څو د دوی په صادراتو په ځانګړې توګه د جلغوزو صادراتو کې اسانتیا رامنځته شي.

د هېواد يو تن سوداګر محبوب الله محمدي وويل، چې لا هم د هېواد د صادراتو پر وړاندې ګڼې ستونزې پرتې دي، چې يوه يې چين، امريکا، اروپا او عربي هېوادونو ته د صادراتو د منظم پروګرام نشتوالى او دويمه ستونزه ده. 

په ورته وخت کې د اقتصادي چارو کارپوهان وايي، که څه هم په تېرو کلونو کې د هېواد د صادراتو کچه د وارداتو په پرتله کمه وه، خو په پرله پسې ډول مخ په زیاتېدو ده.

دوی ټینګار کوي چې دا کار په راتلونکو کلونو کې د افغانستان د اقتصادي ودې لپاره هیله مندي زیاتوي.

د اقتصادي چارو کارپوه احمدحسین د افغان غږ خبری آژانس خبریال ته وویل چې په تېرو دوو کلونو کې د هېواد د صادراتو زیاتوالی به په افغانستان کې د انفلاسیون د کچې د ښه کېدو او د انفلاسیون د کچې د لوړېدو لامل شي.

هغه زیاته کړه چې د افغانستان اسلامي امارت د اغیزمنو سیاستونو په خپلولو سره په دې ډګر کې بریالی شوی دی.

دا په داسې حال کې ده، چې نړيوال بانک په دې وروستيو کې راپور ورکړى، چې د تېر کال په لومړيو درېيو مياشتو کې د افغانستان صادرات څلور سلنه زيات شوي او دغه هېواد له جنورۍ څخه تر اپريل پورې د ٦٠٠ ميليونو ډالرو په ارزښت توکي صادر کړي دي.

د نړیوال بانک په راپور کې ویل شوي چې د افغانستان د انفلاسیون کچه د تېرو کلونو په پرتله د پام وړ کمه شوې ده.