په غزني کې د بزګرانو محصولاتو ته د بازار موندنې په موخه د کرنیزو محصولاتو نندارتون پرانیستل شو

افغان غږ خبری آژانس - کابل: د کرنې، اوبولګولو او مالدارۍ وزارت د اطلاعاتو او عامه پوهاوي رئیس مصباح الدین مستعین نن چهارشنبه د قوس ۲۹ مه د کرنیزو محصولاتو د دغه نندارتون په اړه د افغان غږ خبری آژانس له خبریال سره په خبرو کې په دغه نندارتون کې د غزني ولایت د بزګرانو او مالدارانو هر ډول کرنیز محصولات نندارې ته ایښودل شوي دي.

 

د هغه په ​​وينا، دغه نندارتون پرون د غزني مرستيال والي مولوي رحيم الله محمود، د دغه ولايت د کرنې رييس مولوي محمد ادريس حنيف او د دغه ولايت د سيمه ييزو چارواکو په ګډون د سوداګرو او کروندګرو په شتون سره پرانيستل شو.

 

د ښاغلي مستعین د څرګندونو له مخې، د دغه نندارتون د پرانستلو پر مهال د غزني مرستیال والي رحیم الله محمود د دغه نندارتون په جوړیدو خوښي څرګنده کړه او د غزني د کرنې او مالدارۍ ریاست له هڅو یې مننه وکړه او زیاته یې کړه چې ملي سوداګر باید د غزني د کروندګرو محصولاتو ته مناسب بازار موندنه وکړي.

 

همدارنګه د غزني د کرنې، اوبولګولو او مالدارۍ رئیس محمد ادریس حنیف وویل، چې د غزني ولایت نږدې ۹۰ سلنه خلک په کرنې او مالدارۍ بوخت دي او زیاته یې کړه، چې دغه نندارتون د غزني ولایت په اقتصادي برخه کې مثبت رول لوبولی شي.

 

د غزني د کرنې رييس وويل، چې د دغه نندارتون له جوړېدو څخه مو موخه د کروندګرو او ملي سوداګرو ترمنځ د مستقيم ارتباط رامنځته کول دي، ترڅو د غزني د کروندګرو او بڼوالو محصولات بازار ته وړاندې شي.

 

د يادونې وړ ده، چې په تېر کال کې د هېواد په بېلابېلو برخو کې د نندارتونونو جوړول زيات شوي دي.