له پاکستانه په یوه ورځ کې زر تنه افغان کډوال شړل شوي

افغان غږ خبری آژانس - کابل: د کډوالو او راستنیدونکو چارو وزارت نن چهارشنبه د وږي په ۲۹مه په ایکس ټولنیزه شبکه کې لیکلي چې دغه کډوال د سپین بولدک او تورخم له لارې هېواد ته راستانه شوي دي.

 

د کندهار ولایت د سپین بولدک د سرحداتو ریاست د معلوماتو له مخې، د ۵۰۵ کسانو په ګډون ۹۱ کورنۍ په زوره هېواد ته راستنې شوې او د کډوالۍ په چارو کې له نوم لیکنې وروسته د ملګرو ملتونو د عالي کمېشنرۍ، د خوړو د نړیوال سازمان دفترونو ته ور وپېژندل شوې. 

 

ویل شوي، چې د سپین بولدک د لارې د مسؤلینو له لوري هرې کورنۍ ته لس زره افغانۍ ویشل شوي دي.

 

بل خوا د ننګرهار د تورخم سرحدي اداره وايي، چې له پاکستان څخه د ۴۹۵ کسانو په ګډون ۹۳ کورنۍ په زوره هېواد ته راستنې شوې دي.

 

د تورخم سرحدي قوماندان په وینا، دغه کورنۍ په اجباري کمېټو کې له ثبتېدو وروسته د نورو مرستو په موخه د ملګرو ملتونو د کډوالو چارو کمېشنرۍ او د مهاجرت نړیوال سازمان دفترونو ته ور وپېژندل شوې.

 

په همدې حال کې د اسلامي امارت د مهاجرینو او راستنیدونکو چارو سرپرست وزیر خلیل الرحمن حقاني د مهاجرت د نړیوال سازمان له رئیس سره په کتنه کې په افغانستان کې له راستنیدونکو سره د نړیوالو مرستندویه موسسو د مرستو د زیاتوالي غوښتنه وکړه.

 

د کډوالو چارو وزارت سرپرست د پوهنې، روغتیا او راستنیدونکو ته د سرپناه د برابرولو په برخه کې له مرستندویه بنسټونو د مرستې غوښتنه وکړه.

 

دا په داسې حال کې ده، چې د پاکستان له خوا په دغه هېواد کې د بې اسنادو کډوالو د اوسېدو لپاره له ټاکل شوي ضرب الاجل وروسته هم د دغو کډوالو، چې ډېری یې افغانان دي، د اخراج لړۍ روانه ده.