په سوزمه قلعه ولسوالۍ کې د سېلابونو له امله يوه ښځه او يو ماشوم وژل شوي دي

افغان غږ خبری آژانس - مزار شریف: د سرپل ولایت د سوزمه قلعه ولسوال ملا محمد حسین افتخاری وایی: نن چهارشنبه ( د عقرب ۱۷ مه) ماسپښین شاوخوا دوه بجې د چهاربولک په سیمه کې د جمعه بازار او جمعه بازار په کلیو کې د سخت باران له امله سیلابونه راوتلي چې مالي او ځاني زیانونه یې اړولي دي.

 

هغه زیاته کړه: "سیلاب د یوې بوډۍ میرمنې او یو لس کلن ماشوم ژوند اخیستی او امکان لري چې د مړو شمیر تر دې لوړ وي."

 

د سوزمه قلعه ولسوال وويل، چې سلګونه جريبه کرنيزه ځمکه هم ويجاړه شوې او د يادو سيمو اوسېدونکي د کورنيو او بهرنيو مرستندويه بنسټونو عاجلې همکارۍ ته اړتيا لري.

 

د سرپل ولايت له طبيعي پېښو سره د مبارزې رياست چارواکي وايي، چې په سوزمه قلعه ولسوالۍ کې له سېلاب ځپلو سره د مرستې لړۍ به له لومړنۍ سروې او سرشمېرنې وروسته پيل شي.

 

باید وویل شي، چې سرپل ولایت ۷ اداري واحدونه لري، چې د سرپل ښار، سوزمه قلعه، سانچارک، ګوسفندي، کوهستانات، بلخاب او صیاد ولسوالۍ شاملې دي.