مرکزي بانک به سبا ۱۷ میلیونه ډالره لیلام کړي

افغان غږ خبری آژانس: باختر خبري آژانس خبر ورکړی چې د افغانستان بانک په پام کې لري چې د افغانیو د ارزښت د لا پیاوړتیا په موخه سبا سه شنبه ۱۷ میلیونه ډالره لیلام کړي.
 
مرکزي بانک د یوې خبرپاڼې په خپرولو سره له مستحقو بانکونو او د تبادلې او پیسو د خدمتونو له شرکتونو غوښتي چې په دې داوطلبۍ کې ګډون وکړي او د لیلام ګټونکي مکلف دي چې د ورځې تر پایه خپل حسابونه تصفیه کړي.
 
په خبرپاڼه کې دا هم راغلي چې د راکړې ورکړې جزوي تصفیه اجازه نه لري او د لیلام ګټونکي مکلف دي چې په ټاکلې موده کې یو ځل د افغانستان بانک ته د نغدو پیسو تحویل کړي.
 
دا په داسې حال کې ده، چې دوه ورځې وړاندې مرکزي بانک د افغانۍ د ارزښت د لا پياوړتيا په موخه ١٥ ميليونه ډالره د ليلام له لارې پلورلي وو.