په هرات کې د روږدو کسانو د درملنې لپاره د مرستو راټولول

افغان غږ خبری آژانس - هرات: په دغه پروګرام کې د ښاروالۍ د ادارې د مسؤلینو له خوا سل افغانۍ پرچي جوړ شوي او ټاکل شوې دغه پیسې په نشه يي توکو د روږدو کسانو د راټولولو، له کمپونو څخه د هغوی د وتلو، برابرولو په برخه کې ولګول شي.
 
په دې غونډه کې د هرات ښاروالۍ د ښاري حکومتولۍ رييس جاويد مايار وويل: دا د ښاروالۍ له خوا لومړى ګام دى او د دې پيسو د راټولولو لپاره يو کميسيون هم جوړ شوى دى.
 
ښاغلي مایار زیاته کړه: د ښاروالۍ اداره هڅه کوي چې په ښار کې نور په نشه یي توکو روږدي نشي.
 
له بلې خوا د هرات د امنيې قوماندانۍ له نشه يي توکو سره د مبارزې رييس مولوي حيات الله روحاني د دغه بهير هرکلى وکړ او ويې ويل: له نشه يي توکو سره د مبارزې مديريت د ښاروالۍ له ادارې سره همکاري کوي او د دغه پلان ستاينه کوي.
 
هغه په ​​ډاګه کړه، چې اوسمهال په هرات ښار او ولسواليو کې د ښځو او ماشومانو په ګډون څه باندې ٧٠زره په نشه يي توکو روږدي دي.
 
دغه راز د ښاروالۍ حقوقي سلاکار محمد اکبر شېرزاد په نشه يي توکو د روږدو کسانو راټولول د دولت او ولس دنده وګڼله او له عامو وکيلانو يې وغوښتل، چې ښاروالۍ يوازې نه پرېږدي، د دې پروګرام ملاتړ وکړي او د ښاريانو په وړاندې خپله دنده ترسره کړي.
 
په دې وروستيو کې د هرات د ښاروالۍ د پنځلسمې ناحيې رييس ښاغلي شيرزادي د دغه بهير د هرکلي په ترڅ کې د ښاروالۍ د ادارې او له جوړ شوي پلان څخه ملاتړ وکړ او له مسوولينو څخه يې وغوښتل چې د نشه يي توکو په وړاندې د مبارزې په لاره کې د نشه يي توکو د پرچون پلورونکو د ستونزې په حل کې اقدام وکړي.
 
ويل کيږي چې هرات ښار د زياتو نشه يي توکو د روږدو کسانو د شتون شاهد دى چې د سړکونو په غاړو او د بلوڅو په منځ کې په ښکاره د نشه يي توکو په کارونې بوخت دي.
 
دغه روږدي کسان د خپلو نشه يي توکو لپاره د پيسو د ترلاسه کولو په موخه هر ډول جرمونه په ځانګړې توګه غلا کوي، چې تل يې د ښاريانو له خوا شکايتونه شوي دي.