د دولتي ډبرو سکرو ویش؛ خلک: دا هیڅ کیفیت نلري او نه سوځوي

افغان غږ خبری آژانس - کابل: د کانونو او پټرولیم وزارت ویاند محمد امید خرم، افغان غږ خبری آژانس ته وویل، چې دغه وزارت د کابل ښار پر څه باندې ۶۰ زره کورنیو د لوړ کیفیت سکاره ویشلي دي.
 
د خرم په خبره، هرې لویې کورنۍ ته یو ټن او نیم ټن کوچنیو کورنیو ته د لوړ کیفیت سکاره وویشل شول.
 
خرم زياته کړه چې دغه پروسه په ډېر دقت سره ترسره شوې او وزارت ژمن دى چې په راتلونکي کې دغه بهير ګړندى او شفاف کړي.
 
په همدې حال کې د کابل ښاروالۍ ویاند نعمت الله بارکزی وايي، دا اداره د څارنې او وېش مسوولیت لري او کیفیت یې د کانونو او پټرولیم وزارت پورې اړه لري.
 
بارکزي زياته کړه، چې څلور ډوله سکاره (خاک، جغتو، بادامي) د کابل ښار په ٣٢ ځايونو او ٢٢ ولسواليو کې په ارزانه بيه پلورل کېږي.
 
هغه په ​​دوام وويل چې تر اوسه پورې ٣٠ زره ټنه سکاره په ارزانه بيه پر خلکو پلورل شوي او د سالنګ په تونل کې د اور لګېدنې له امله په موقتي ډول دغه کار په ټپه درېدلی دی.
 
د ديارلسمې ناحيې اوسېدونکى عزيز وايي، چې لس ورځې وړاندې يې يو ټن چارکول په ٩٠٠٠ افغانۍ اخيستي، چې چارکول وو او په هېڅ ډول نه سوځېدل.
 
يو بل اوسېدونکى نادر وايي، هغه سکاره چې دولت يې پر خلکو وېشي، ټيټ کيفيت لري او نه سوځېږي.
 
باید وویل شي، چې څه موده وړاندې حکومت د هېوادوالو د خراب اقتصادي وضعیت له امله اعلان وکړ، چې د ډبرو سکاره به له بازار څخه په ټیټه بیه پر خلکو وېشي، خو وبه لیدل شي، چې د دې ډبرو سکارو کیفیت څومره دی.