په هرات کې د ښځو لپاره د هنر او مسلک تر ټولو ستر نندارتون پرانیستل شو

افغان غږ خبری آژانس - د هرات ولایت د کار او ټولنیزو چارو رئیس مولوی حافظ میرزا محمد ابو منصور وایی چې د دغه نندارتون له جوړیدو څخه یې موخه د ښځو کار ته بازار موندنه ده.
 
د هرات د ټولنيزو چارو رئيس وايي، اسلامي امارت د ښځو د کار مخالف نه دی او ښځې هم د اسلامي شرايطو له مخې د کار کولو حق لري.
 
حفيظ منصور زياته کړه: ځينې وايي چې اسلامي امارت ښځو ته د کار حق نه دی ورکړی، په داسې حال کې چې په دغه نندارتون کې د ښځو ونډه ډېره ده او د ښځو لاسته راوړنې نندارې ته وړاندې شوې دي.
 
حفیظ منصور وویل: "موږ نړۍ ته ثابته کړه چې موږ د شریعت له مخې د ښځو د کار ملاتړ کوو او د هغوی د کار مخالفت نه کوو".
 
د هرات ولايت د کار او ټولنيزو چارو رييس زياته کړه: همدا اوس په هرات ولايت کې څو وړکتونونه د يتيم ماشومانو د روزلو لپاره کار کوي او د دې ترڅنګ د ماشومانو د ساتنې موسسې هم ورته حرفوي زده کړې ورکوي.
 
ده زیاته کړه: د کار او ټولنیزو چارو ریاست په تیرو اتو میاشتو کې درې زره کورنیو ته د کار جوازونه ویشلي دي.
 
په همدې حال کې دهرات ولايت داطلاعاتو او کلتور رئيس مولانا نعيم الحق حقاني ددغه نندارتون دپرانستلو په مراسمو کې وويل: دغه محصولات ځانګړى ارزښت لري او له سوداګرو څخه مو غوښتنه ده چې د بازارموندنې او پلورنې زمينه برابره کړي.
 
مولانا حقاني زیاته کړه: د مسلک ملاتړ او خلکو ته د کار پیدا کول د اسلامي امارت لومړیتوب دی.
د هرات د اطلاعاتو او کلتور رئيس زياته کړه: د کار او روزګار په ملاتړ سره به په ټولنه کې د وزګارتيا کچه راټيټه شي.
 
مولانا حقاني ټینګار وکړ: "بهرنیان زموږ لاسونه نه نیسي او موږ هم چا ته لاس نه اوږدوو، ځکه چې موږ هر چا ته لاس اوږدوي، هغه له موږ څخه لس نور شیان غواړي."
 
د هرات د اطلاعاتو او کلتور رئيس زياته کړه: سوال کول په اسلام کې حرام دي، هر انسان بايد کار وکړي، ځکه سوال کول د مسلمان ځانګړنه نه ده.
 
ويل کيږي چې په دغه نندارتون کې د ښځو د لاسي صنايعو ٥٠ غرفې نندارې ته ايښودل شوي چې درې ورځې به دوام وکړي.