د مالیې په وزارت کې د ۱۹۷ میلیارده افغانیو د عوایدو راټول شوي؛ په ادارو کي اداري فساد صفر ته رسېدلی دی

افغان غږ خبری آژانس - کابل: د مالیې وزارت د عوایدو عمومي رئیس وايي چې د تېر کال په اسد میاشت کې د اسلامي امارت له جوړېدو وروسته دغه وزارت ۱۹۷ میلیارده افغانۍ عواید راټول کړي دي.
 
د دغه وزارت د عوایدو عمومي رئیس محمد معراج معراج له آریانانیوز سره په خبرو کې ویلي، چې د مالیې وزارت عواید د دولت له لګښتونو ډېر دي، له همدې امله یې پراختیايي پروژې پیل کړې دي.
 
ښاغلي معراج په افغانستان کې اقتصادي بحران ته په اشارې سره وویل: نړیواله ټولنه د دغه بحران د خپریدو لامل ده، خو د مالیې وزارت په هیواد کې د اقتصادي ستونزو د حل لپاره هوډمن دی.
 
د مالیې وزارت د عوایدو عمومي رئیس زیاته کړه، چې په افغانستان کې د بې وزلۍ د شتون په اړه ارقام هغه حد ته نه دي، چې نړیوال سازمانونه یې خبرداری ورکوي.
 
ښاغلی معراج وايي: موږ هیچا ته د سوال لاس نه اوږدوو. موږ په خپلو لاسونو افغانستان جوړوو. موږ د خلکو په لاسونو جوړوو. بهرني هیوادونه غواړي موږ بدبخته کړي. "هغوی هڅه وکړه چې زموږ اقتصادي او سوداګریز سیسټم ګډوډ کړي، خو موږ تر نن ورځې ورسره مخ یو او زموږ وضعیت ورځ تر بلې ښه کیږي."
 
د مالیې وزارت دغه چارواکي همداراز ټینګار وکړ چې د دغه وزارت په عوایدو کې مالي فساد صفر ته رسېدلی دی.
 
د هغه په ​​وينا، د عوايدو ډېرى رياستونه په پرمختللو برېښنايي سيسټمونو پورې تړلي دي او ډېرى عوايد له ګمرکونو او يو شمېر نورو دولتي ادارو څخه راټولېږي.
 
ښاغلي معراج وویل: د اسلامي امارت په دفترونو کې د فساد کچه صفر ته رسیدلې ده. په ځانګړې توګه د ګمرکونو په عمومي ریاست او د عوایدو په عمومي ریاست کې شفافیت تضمین شوی دی. "د اسلامي امارت له فتحې مخکې، که څه هم په لوړه کچه تجارت او ډېرې پروژې وې، خو عاید یې ډېر کم وو."
 
د مالیې وزارت دغه چارواکي ویلي، چې په دې اداره کې ۱۱۰ ښځې کار کوي، چې ډېری یې له کوره کار کوي او میاشتنی معاش ورکول کېږي.
 
هغه ټینګار وکړ چې که سم چاپیریال برابر شي ښځې به بیرته خپل دفتر ته راستانه شي.