امریکا له اوکراین سره د پوځي مرستو د نوې بستې ژمنه وکړه

افغان غږ خبری آژانس: د سپینې ماڼۍ د ملي امنیت سلاکار جیک سلیوان د جمعې په ورځ د اوکراین له ولسمشر ولادیمیر زیلینسکي سره د لیدو لپاره کیف ته سفر وکړ. هغه د امریکا د څلور سوه ملیون ډالرو نوې پوځي مرستې بسته اعلان کړه. د امنیتي مرستو په دې نوې کڅوړه کې بیا ترمیم شوي T-72 ټانکونه شامل دي.
 
دا لومړی ځل دی چې امریکا اوکراین ته ټانکونه لیږي. په دې بسته کې به پرمختللي بې پیلوټه الوتکې او د ځمکې څخه هوا ته ۲۵۰ هاک توغندي هم شامل وي.
 
سپینې ماڼۍ اعلان وکړ چې دا غونډه د اوکراین او د دې هیواد د حاکمیت او ځمکنۍ بشپړتیا څخه د دفاع په برخه کې د امریکا او د دې هیواد د خلکو په ټینګ ملاتړ د ټینګار لپاره جوړه شوې وه. د زیلینسکي سره یوځای، سلیوان د ولسمشرۍ د دفتر مشر "انډري یرمک" او د دفاع وزیر "الیکسي رزنیکوف" سره وکتل.
 
د دې اونۍ په پیل کې، کریس کونز او روب پورټمن هم کییف ته لاړ ترڅو د منځمهاله انتخاباتو څخه مخکې د زیلینسکي سره وګوري او د اوکراین لپاره دوه اړخیز ملاتړ پیاوړی کړي.
 
د دوی غونډه په داسې حال کې کیږي چې جمهوري غوښتونکي او دیموکراتان د اوکراین لپاره د متحده ایالاتو د ملاتړ پر سر اختلاف لري. تر دې مخکې د دواړو ګوندونو یو شمېر وکیلانو له اوکراین سره د امریکا پر میلیاردونو ډالرو پوځي او اقتصادي مرستو انتقادونه کړي وو.
 
د متحده ایالاتو د استازو د جرګې د جمهوري غوښتونکو مشر کیون مک کارتي وویل: "هغه جرګه چې د جمهوري غوښتونکو لخوا کنټرول کیږي د اوکراین لپاره "خالی چک" نه لیکي.
 
د فبرورۍ په میاشت کې پر اوکراین د روسیې د یرغل له پیل راهیسې، متحده ایالاتو له اوکراین سره تر اتلس ملیارد ډالرو زیاتې امنیتي مرستې او یو نیم میلیارد ډالر بشري او اقتصادي مرستې کړې دي.