د بامیان ولایت په مرکز کې د یو شمېر ولایتونو د لاسي صنایعو نندارتون پرانیستل شو

افغان غږ خبری آژانس - بامیان: د «افغانستان خزانې» تر عنوان لاندې د لاسي صنایعو او هنري نندارتون د پرانېستې مراسم پرون دوشنبه د اسد له لومړۍ نیټې د پنځو ورځو لپاره د بامیان ولایت په مرکز کې پیل شول. 

په دې مراسمو کې د بامیانو والي مولوي عبدالله سرحدي په یووالي او پیوستون د ټینګار ترڅنګ د ټولنې له ټولو طبقو وغوښتل چې یووالي او همغږي وساتي او له یو بل سره په مرسته او همکارۍ سره د کورني صنعت د ودې لپاره کار وکړي.

هغه له کورنيو سوداګرو وغوښتل چې د بې کيفيته بهرنيو توليداتو له واردولو ډډه وکړي او د افغاني لاسي صنايعو د صادراتو په برخه کې زيات کار وکړي.

 د بامیان ولایت والي د لاسي صنایعو له بازار څخه د خپل ملاتړ د اعلانولو ترڅنګ، د نظامي او ملکي چارواکو د هر اړخیز ملاتړ ډاډ هم ورکړ.

له بلې خوا د باميانو ولايت د صنعت او سوداګرۍ رييس خيرالله نورزي د افغان غږ خبری آژانس له خبريال سره په مرکه کې وويل چې دغه نندارتون د لاسي صنايعو د خرڅلاو او ودې، بازار ته د هغوى د معرفي کولو او د هنرمندانو د ملاتړ په موخه جوړ شوى، څو لاسي صنايع وکولاي شي. په پراخه کچه ښودل شوي.

هغه وويل، چې په دې نندارتون کې څه باندې ٢٠٠ غرفې شتون لري او زياته يې کړه، چې دغه غرفې يواځې د لاسي صنايعو او کورنيو توليداتو دي.

په همدې حال کې د "باشي" شرکت استازي خیبر هدمل چې د دغه نندارتون یو له تنظیم کوونکو څخه هم دی، د افغان غږ خبری آژانس له خبریال سره په مرکه کې وویل چې دغه نندارتون به د اسد له لومړۍ نېټې څخه تر پنځمې نېټې پورې پنځه ورځې دوام وکړي.

هغه دې ته په اشارې سره چې په دغه نندارتون کې اکثره برخه اخیستونکي ښځې دي، زیاته کړه چې په دغه نندارتون کې د یو شمېر ولایتونو هنرمندانو ګډون کړی دی.

په ورته وخت کې د لاسي صنایعو له ډلې شریفې احمدي د افغان غږ خبری آژانس له خبریال سره په مرکه کې وویل چې د دغه ډول نندارتونونو جوړول د لاسي صنایعو د خرڅلاو د زیاتوالي او د هنرمندانو د اقتصادي وضعیت په ښه کولو کې هم ګټور تمامېږي.

هغه زياته کړه، چې د لاسي صنايعو ډېرى پېرودونکي بهرني دي او له دولت څخه يې وغوښتل، چې د نندارتونونو په جوړولو کې دې د يادو صنايعو له هنرمندانو سره زياته همکاري وکړي.

له بلې خوا د فراه زرين غالۍ اوبدلو شرکت مشر عبدالجبار عبادي له افغان غږ خبری آژانس خبريال سره په مرکه کې وويل چې د کافي برېښنا د نشتوالي له امله هنرمندان په دې برخه کې پراخ کار نه شي کولاى.

نوموړي دې ته په اشارې سره چې د لاسي صنايعو د ورکشاپونو د جوړولو لکه د غاليو د تار رنګولو، د نويو غاليو پرې کولو او يو شمېر نورو شيانو لپاره کافي برېښنا ته اړتيا ده، له دولت څخه يې وغوښتل چې د برېښنا د برابرولو لپاره هڅې وکړي.