ایران د کابل په خیرخانې سیمه کې چاودنه وغندله/ ذبیح الله مجاهد: د دې جنایت عاملین به ژر تر ژره د خپلو اعمالو په سزا ورسوي

افغان غږ خبری آژانس: د ایران د اسلامي جمهوریت د بهرنیو چارو وزارت ویاند ناصر کنعاني د کابل ښار د خیرخانې په سیمه کې په یوه جومات کې هغه تروریستي چاودنه په کلکه وغندله چې په پایله کې یې ګڼ شمیر لمونځ کوونکي شهیدان او ټپیان شول.
 
د ايران د بهرنيو چارو وزارت وياند د دغه تروريستي عمل د شهيدانو له کورنيو سره د خواخوږۍ په څرګندولو سره، ټپيانو ته د عاجلې روغتيا هيله وکړه.
 
د افغانستان د اسلامي امارت ویاند ذبیح الله مجاهد هم په خپله ټویټرپاڼه کې د کابل د خیرخانې اړوند په جامع جومات کې چاودنه په کلکه غندلې او شهیدانو ته یې د جنت الفردوس، ټپیانو ته د عاجلې شفا او ټپیانو ته د جمیل صبر دعا کړې ده.
 
هغه ټینګار وکړ چې د ملکي وګړو قاتلین او د دغه ډول جنایتونو عاملین به ژر تر ژره ونیول شي او د خپلو اعمالو په سزا به ورکړل شي.
 
په ورته وخت کې د افغانستان پخواني جمهور رئیس حامد کرزي د کابل ښار د ۱۷مې ناحیې اړوند صدیقیه جومات کې هغه چاودنه چې د ماښام د لمانځه پر مهال رامنځته شوه په کلکو ټکو غندلې ده. د جومات د امام په ګډون د عبادت کوونکو.
 
هغه زیاته کړه، زه دغه بشر ضد جنایت له ټولو انساني او اسلامي ارزښتونو سره په ټکر کې او زموږ له ګران هېواد او خلکو سره ښکاره دښمني ګڼم.
 
پخواني جمهور رئیس د دغې غمجنې پېښې د قربانیانو له کورنیو سره د خپلې خواخوږۍ او ډاډګېرنې مراتب څرګند کړل او د لوی خدای له دربار څخه یې شهیدانو ته د فردوس جنت، ټپیانو ته د جمیل صبر او ټپیانو ته د عاجلې روغتیا دعا وکړه.
 
دغه ترهګریز برید د یو شمېر نړیوالو سازمانونو او بنسټونو له خوا په کلکه غندل شوی دی.
 
رسمي سرچينو تر اوسه د دې پېښې د مرګ ژوبلې د کره شمېرې په اړه څه نه دي ويلي، خو غير رسمي سرچينو بېلابېلې احصايې او ارقام وړاندې کړي دي. ځینو سرچینو ویلي: په جومات کې د لسګونو کسانو جسدونه لیدل کیږي، لاسونه او پښې یې غوڅ شوي دي.
 
تر اوسه ځینو سرچینو په دې چاودنه کې د ۳۰ تنو د وژل کېدو او تر ۶۰ ډېر د ټپي کېدو پخلی کړی دی.
 
الجزیرې شبکې د یوې امنیتي سرچینې په حواله ویلي، چې په دې چاودنه کې ۲۰ تنه وژل شوي او ۴۰ نور ټپیان شوي دي.
 
د کابل امیر ژنیف روغتون په یوه ټویټ کې ویلي، چې تر دې دمه د تېر ماښام له چاودنې ۲۷ ټپیان دغه روغتون ته لېږدول شوي دي.
 
په ټولنیزو رسنیو کې خپاره شوي ویډیوګانې هم د جومات شاوخوا په وینو لړلي جسدونه ښیې.
 
تر اوسه د دغه برید انګېزه نه ده معلومه او نه یې هم چا یا کومې ډلې پړه پر غاړه اخیستې ده. خو تر دې وړاندې د داعش ترهګرې ډلې په عمده توګه د دغه ډول بریدونو مسوولیت په غاړه اخیستی دی.