د بالامرغاب ولسوالۍ د قومندانۍ سقوط په اړه ضد او نقیض راپورونه

وسله والو طالبانو له تېرو درې ورځو راپدېخوا بالامرغاب ولسوالي محاصره کړې وه.
د بادغیس د ولایتي شورا مشر عبدالعزیز بېګ د شنبې په ورځ د «وري میاشتې پر ۱۷مه» امریکا غږ ته وویل، چې په امنیه قوماندانۍ کې لسګونه پولیس چې له تېرو درې ورځو یې مقاومت کاوه په سیمه کې د ملي اردو یو کنډک ته تللي دي.
نوموړي زیاته کړه چې جګړه اوس هم روانه ده.

د بادغیس د والي ویاند جمشید شهابي هم امریکا غږ ته وویل، چې پولیسو د ځان د خوندیتوب په هدف د بالامرغاب امنیه قومانداني پریښې او د مرغاب سیند هغې غاړې ته د ملي اردو د درېیمې لوا کنډک کې له ملي اردو سره یو ځای شوي دي.
ښاغلي شهابي زیاته کړه، چې د افغانستان دفاع وزارت لومړی مرستیال یاسین ضیاء هم د بالامرغاب د جګړې د مدیریت لپاره دغه ولسوالۍ ته رسېدلی او په سیمه کې د وسله والو د ځپلو په هدف ځمکني‌ او هوايي عملیات پيل کړي دي.
د بادغیس د والي ویاند همدارنګه وویل، چې د تېرې شپې په نښتو کې څلور افغان پولیس وژل شوي او شپږ نور ټپیان شوي او همدارنګه ۳۰ طالبان وژل شوي او ۱۲ نور ټپیان دي.
طالبانو هم منلې چې د بالامرغاب د امنیې قوماندانۍ ودانۍ او محبس یې نیولي دي.
خو د افغانستان د کورنیو چارو وزارت ویاند نصرت رحیمي بیا پر خپل ټوېټر پاڼه لیکلي چې د بالامرغاب ولسوالۍ د سقوط په اړه راپورونه واقعیت نه‌لري.
نوموړي ویلي، چې افغان ځواکونو د بالامرغاب د امنیه قومندانۍ محاصره ماته کړې ده. د بادغیس د ولایتي شورا مشر عبدالعزیز بېګ همدارنګه د دغه ولایت پر ابکمري ولسوالۍ هم د طالبانو د حملې خبر ورکړ.
نوموړي زیاته کړه، چې طالبانو تېره شپه د څو ساعتونو لپاره د یادې ولسوالۍ د ودانۍ تر نیولو وروسته د ولسوالۍ ودانۍ سوځولې او ګڼ پوځي وسایل یې هم له ځان سره وړي دي.
خو د بادغیس ولایتي چارواکي بیا پر ابکمري ولسوالۍ د طالبانو حمله ردوي او زیاتوي چې یوازې دوې پوستې سقوط شوي چې وروسته د افغان سرتېرو لخوا نیول شوي دي.
د والي ویاند جمشید شهابي وویل چې د ابکمري په نښته کې دوه پولیس وژل شوي او یو بل ټپي شوی او ۸ طالبان وژل شوي او پنځه نور ټپیان شوي دي.