د بادغیس د ولایتي شورا مسؤلین وايي، په بالامرغاب ولسوالۍ کې د تېرو درې ورځو سختو نښتو له امله نن شنبه وسله والو طالبانو د دغه ولسوالۍ د امنیې قوماندانۍ مرکز نیولی دی.

وسله والو طالبانو له تېرو درې ورځو راپدېخوا بالامرغاب ولسوالي محاصره کړې وه.
د بادغیس د ولایتي شورا مشر عبدالعزیز بېګ د شنبې په ورځ د «وري میاشتې پر ۱۷مه» امریکا غږ ته وویل، چې په امنیه قوماندانۍ کې لسګونه پولیس چې له تېرو درې ورځو یې مقاومت کاوه په سیمه کې د ملي اردو یو کنډک ته تللي دي.
نوموړي زیاته کړه چې جګړه اوس هم روانه ده.

د بادغیس د والي ویاند جمشید شهابي هم امریکا غږ ته وویل، چې پولیسو د ځان د خوندیتوب په هدف د بالامرغاب امنیه قومانداني پریښې او د مرغاب سیند هغې غاړې ته د ملي اردو د درېیمې لوا کنډک کې له ملي اردو سره یو ځای شوي دي.
ښاغلي شهابي زیاته کړه، چې د افغانستان دفاع وزارت لومړی مرستیال یاسین ضیاء هم د بالامرغاب د جګړې د مدیریت لپاره دغه ولسوالۍ ته رسېدلی او په سیمه کې د وسله والو د ځپلو په هدف ځمکني‌ او هوايي عملیات پيل کړي دي.
د بادغیس د والي ویاند همدارنګه وویل، چې د تېرې شپې په نښتو کې څلور افغان پولیس وژل شوي او شپږ نور ټپیان شوي او همدارنګه ۳۰ طالبان وژل شوي او ۱۲ نور ټپیان دي.
طالبانو هم منلې چې د بالامرغاب د امنیې قوماندانۍ ودانۍ او محبس یې نیولي دي.
خو د افغانستان د کورنیو چارو وزارت ویاند نصرت رحیمي بیا پر خپل ټوېټر پاڼه لیکلي چې د بالامرغاب ولسوالۍ د سقوط په اړه راپورونه واقعیت نه‌لري.
نوموړي ویلي، چې افغان ځواکونو د بالامرغاب د امنیه قومندانۍ محاصره ماته کړې ده.