د قربانیانو کورنۍ په کندهار د ډلیز قبر د عاملینو پر پیژندلو ټینګار کويکريمي: موندل شوی قبر د تېر رژیم اړوند دی

اسلامي امارت د کندهار ولایت په سپین بولدک ولسوالۍ کې د یوه ډله ییز قبر تر کشف وروسته وايي چې دغه قبر ۸ کاله وړاندې د پخواني حکومت د واکمنۍ پر مهال دی او په اړه یې پلټنې روانې دي. په همدې حال کې د قربانیانو کورنۍ او په افغانستان کې د بشري حقونو لپاره د ملګرو ملتونو ځانګړی استازی د دغه جنایت د عاملینو په پېژندلو او د عدالت پر تامین ټینګار کوي.

افغان غږ خبری آژانس: دغه ډله ایز قبر د یکشنبې په ورځ ماسپښین ۳ بجې د سپین بولدک ولسوالۍ په "نوی بند" سیمه کې د اوبو د څاه کیندلو پر مهال کشف شو. د دغه ډله ييز قبر په انځورونو کې چې په ټولنيزو رسنيو کې خپرېږي، ليدل کېږي چې ځايي خلک له دغه قبر څخه د ١٦ تنو مړي را ايستلي دي.

یو شمېر خلک او د دغو قربانیانو خپلوان عدالت غواړي. د قرباني ورور عبدالرحيم وويل: "موږ عدالت غواړو، د دې جنايتونو عاملين بايد وپېژندل شي."

د ارزګان ولایت یو بل اوسیدونکی وایي: موږ له نړیوالې ټولنې او اسلامي امارت څخه غوښتنه کوو چې د جګړې جنایتونه په عادلانه توګه وڅیړي او مجرمین د عدالت منګولو ته وسپاري.

په همدې حال کې د اسلامي امارت د ویاند مرستیال دغه ډله ییز قبر اته کاله وړاندې منسوبوي او وايي چې په اړه یې پلټنې روانې دي.

د اسلامي امارت د ویاند مرستیال بلال کریمي وویل: د کندهار د سپین بولدک اوسیدونکو دغه قبر د څاه کیندلو پر مهال کشف کړ. د دغه قبر تاریخ له ۸ تر ۹ کلونو وړاندې هغه وخت دی چې پخوانی حکومت په واک کې و. په دې اړه زموږ څېړنې روانې دي.

بل خوا په افغانستان کې د بشري حقونو لپاره د ملګرو ملتونو ځانګړی استازی د کندهار په سپین بولدک کې د یوه ډله ییز قبر د موندلو په غبرګون کې وايي، چې تر څېړنو مخکې باید د مړو پاتې شوني نور زیانمن نه شي.

ریچارډ بینیټ تحقیقاتو غوښتنه کړې.

بینیټ وویل: "دا خورا مهمه ده چې د دې ډله ایز قبر پاتې شوني تر نورو عدلي معایناتو پورې لمس یا زیانمن نشي. دا هم مهمه ده چې د قربانیانو د کورنیو حساسیتونو ته درناوی وشي.

په ورته وخت کې د بشري حقونو د څار اداره غواړي چې ټول جنګي جنایتونه له نړیوالو معیارونو سره سم وڅېړي.

د بشري حقونو د څار د اسیا مشرې پیټریشیا ګوسمن وویل: "د قبر کشف به چارواکو ته د غچ اخیستونکو اقداماتو لپاره اړین مخنیوی ورکړي." لکه څنګه چې د ملګرو ملتونو د بشري حقونو شورا په افغانستان کې د حساب ورکونې ملاتړ کوي. "دا حیاتي ده چې ټول ادعا شوي جرمونه د نړیوالو معیارونو سره سم د عدالت د پروسې د یوې برخې په توګه وڅیړل شي."