ملګري ملتونه په کاپیسا کې د پروژو د تطبیق په برخه کې همکاري کوي

افغان غږ خبری آژانس - کابل: نن سه شنبه (د عقرب ۱۵ مه) د انرژۍ او اوبو وزارت مطبوعاتي دفتر د یوې خبرپاڼې په خپرولو سره ویلي چې د کاپیسا د سمندري حوزې مشر انجنیر کاوه خروش له غلام مرتضی خاشع په افغانستان کې د ملګرو ملتونو د پراختیايي پروګرام د دفتر د معیشت کارپوه او ورسره ملګري پلاوي سره وکتل او د اوبو د سرچینو د پروژو، د کانالونو د ترمیم او بیارغونې، د بندونو د جوړولو، د سیندونو د ټینګښت او د اوبو رسولو د شبکو په اړه وکتل او د نظر تبادله یې وکړه.
په دې خبرپاڼه کې راغلي چې د کاپيسا د سمندري حوزې د کارکوونکو لپاره د څښاک، کرنيزو او صنعتي اوبو د څاګانو د کيندلو د اسنادو د تنظيم په اړه د ظرفيتونو د لوړولو پروګرام هم پيل شو.
دغه راز خبرپاڼه خبر ورکوي، چې د (U,I,D,P) ادارې استازو د کاپيسا د انرژۍ او اوبو رياست کارکوونکو ته د روزنې ترڅنګ د يادو پروژو د پلي کېدو په برخه کې د همکارۍ ژمنه هم وکړه.