افغان غږ خبری آژانس - کابل: د انرژۍ او اوبو وزارت مطبوعاتي دفتر اعلان کړی، چې د دغه وزارت د پانګونې جذب رئیس داد محمد زرمتي، د حسیب صافي عاشوري له مسوولینو او د هغه له چینايي همکارانو سره وکتل.
د دغه وزارت د معلوماتو له مخې، په دې غونډه کې د ياد شوي شرکت مسوولينو او د هغې چينايي همکارانو له باد، لمريزې برېښنا، ډبرو سکرو او د برېښنا د توليد له بندونو څخه د انرژۍ د توليد په پروژو کې د پانګونې لپاره لېوالتيا څرګنده کړه.
په دې کتنه کې د پانګونې د جلب او جذب رييس د ياد شوي شرکت له مسوولينو سره د انرژۍ د توليد په پروژو او د برېښنا د توليد د بندونو په برخه کې د پانګونې د زمينې د برابرولو په خاطر د هر ډول همکارۍ ژمنه وکړه.
د يادونې وړ ده، چې په افغانستان کې د اسلامي امارت له بيا جوړېدو وروسته د اوبو او انرژۍ په پروژو کې د کورنيو او بهرنيو پانګوالو لېوالتيا زياته شوې ده.