میرویس عزیزي په دوبۍ کې د نړۍ دویم تر ټولو لوړ برج جوړوي

افغان غږ خبری آژانس: نوموړي له CNN سره په خبرو کې وویل چې د دوبۍ د چارواکو په منظورۍ د روان کال په جنورۍ میاشت کې د عزیزي ټاور د جوړولو کار پیل شو.

ښاغلي عزیزي په دې خبرو کې وویل: موږ دوه پلانونه درلودل؛ یو د 526 مترو په ابتدايي لوړوالي سره او بل د 725 مترو په لوړوالي سره، چې تایید شوی.

د هغه په ​​وينا، د دغه برج د جوړېدو لومړني کارونه په ښه توګه روان دي.

دا برج د دوبۍ د نړیوال سوداګریز مرکز په سیمه کې د شیخ زاید سړک پر غاړه موقعیت لري.

دا مهال په دوبۍ کې برج خلیفه د ۸۲۸ مترو په لوړوالي سره د نړۍ تر ټولو لوړه ودانۍ ده.

عزیزي ټاور چې ۱۳۱ پوړونه لري اپارتمانونه، یو اووه ستوریز لوکس هوټل او یو سوداګریز مرکز به ولري.

ميرويس عزيزي وويل، چې د دې پروژې پانګونه له ١،٦ ميليارده ډالرو ډېره شوې ده.

هغه د دې برج د جوړولو په اړه وویل: "د عزیزي برج لپاره زما لید دا دی چې یو تلپاتې میراث رامینځته کړي، د دوبۍ د اوسیدونکو او لیدونکو دواړو لپاره د غوره ځای په توګه درناوی او د انجینرۍ په برخه کې یوه لویه لاسته راوړنه ده."

ټاکل شوې چې عزیزي ټاور به په ۲۰۲۸ کال کې بشپړ شي او اپارتمانونه به د ۲۰۲۵ کال په فبروري کې وپلورل شي.