په هرات ولایت کې یوزرو ۳۰۰ معتادین خپلو کورنیو ته راستانه شول

افغان غږ خبری آژانس: د هرات د امنیې قوماندانۍ له نشه‎يي توکو سره د مبارزې مدیر مولوي حیات الله روحاني وايي: په نشه‎يي توکو ۱۳۰۰ تنه روږدي کسان چې تر درملنې لاندې وو، له رغېدو وروسته خپلو کورنيو ته راستانه شوي دي.

هغه زیاته کړه، دغه کسان له ۱۰ تر ۱۶ میاشتو پورې د معتادینو د درملنې په مرکز کې تر درملنې لاندې وو. د هغه په ​​وينا، دغه کسان له بېلابېلو ولايتونو څخه دي.

مولوي روحاني همداشان زیاته کړه: په دغه مرکز کښې څه د پاسه پنځه زره روږدي کسان تداوي کیږي او د روغتیايي معیارونو له مخې د هغوي درملنه کیږي او د هغوي لپاره لازمې اسانتیاوې برابرې شوي دي.

د هرات د نشه يي توکو پر وړاندې د مبارزې رييس دغه راز ډاډ ورکړ، چې اوس مهال هرات ښار له نشه يي توکو پاک دى او په ښار کې د نشه يي توکو د راټولولو ډلې فعالې دي.

هرات ولایت د هېواد یو له سرحدي ولایتونو څخه دی، چې هر کال په کې زیات شمېر کډوال راځي، چې ویل کېږي ځینې یې په نشه يي توکو روږدي دي.
ويل کيږي چې دغو کسانو د مناسبو ځايونو د نشتوالي له امله د سړکونو په غاړه ژوند کاوه چې د ښاريانو د ناخوښۍ او ناخوښۍ سبب ګرځي.