مولوي عبدالکبیر له فضل الرحمن سره په کتنه کې: موږ امنیت او ثبات غواړو

افغان غږ خبری آژانس - کابل: د لومړي وزیر سیاسي مرستیال مولوي عبدالکبیر ویلي چې کابل په سیمه کې امنیت او ثبات غواړي او هیچا ته به اجازه ورنه کړي چې د افغانستان خاوره د بل چا پر ضد وکاروي.

مولانا فضل رحمان د پاکستاني علماوو د يوه پلاوي په مشرۍ پرون (يکشنبه د جدی په ١٧مه) کابل ته راغى.

دغه پاکستاني پلاوي د لومړي وزير له سياسي مرستيال مولوي عبدالکبير او د سرپرستې کابينې له ځينو غړو سره کتلي دي.

د سې شنبې په ورځ د یوې خبرپاڼې په خپرولو سره عبدالکبیر هیله وښوده چې د پاکستاني علماوو سفر به د افغانستان او پاکستان ترمنځ د اړیکو په ټینګولو او د «غلط فهمیو په کمولو» کې اغېزمن تمام شي.

هغه زیاته کړه، اسلامي امارت له ټولو ګاونډیو هېوادونو په ځانګړې توګه له پاکستان سره د متقابل احترام پر بنسټ ښې او باثباته اړیکې غواړي.

هغه وویل، دوی ډاډ ورکوي چې له افغانستان څخه به هیڅوک له خطر او ګواښ سره مخ نه شي او "ښه به دا وي چې د ادعاوو او رسنیو د پروپاګند پر ځای پر حقایقو بحث وشي".

د ارګ په خبرپاڼه کې ویل شوي، چې فضل الرحمن کابل ته له خپل سفر څخه خوښي څرګنده کړه او ویې ویل، دواړه "اسلامي هېوادونه" مشترکات لري او ستونزې باید د خبرو له لارې حل شي. هغه وویل: "موږ باید د یو بل د ګټو لپاره د همکارۍ پلیټ فارمونه جوړ کړو او یو له بل سره همکاري وکړو".

دغه پاکستاني عالم زیاته کړه چې د افغان مهاجرینو د ایستلو په اړه د پاکستان د حکومت پریکړه غندي.