د سوداګرو لپاره لازمې اسانتیاوې په پام کې نیول شوې دي

افغان غږ خبری آژانس - کابل: د رئیس الوزرا مطبوعاتي دفتر د یوې خبرپاڼې په خپرولو سره ویلي چې د رئیس الوزرا د دفتر اداري مرستیال مولوي عبدالسلام حنفي د هېواد له یو شمېر ملي سوداګرو سره وکتل.
 
دوی وویل چې په تېرو کلونو کې سوداګرو او پانګوالو ځاني او مالي امنیت نه درلود او دې مسلې د دوی په سوداګرۍ او سوداګرۍ منفي اغېز کړی وو، خو د اسلامي امارت په جوړېدو سره په ټول هېواد کې امنیت تامین شوی او سوداګر او پانګوال کولی شي په پوره ډاډ سره سفر وکړي، دوی چمتو دي چې د هیواد په بیلابیلو سکتورونو کې پانګونه وکړي.

دوی د اسلامي امارت له مسوولینو وغوښتل چې په بېلابېلو برخو کې د سوداګرو او پانګوالو لپاره د لا زیاتو اسانتیاوو رامنځته کولو ته ځانګړې پاملرنه وکړي.

له بلې خوا دوزيرانو شورا اداري مرستيال مولوي عبدالسلام حنفي له سوداګرو او پانګوالو سره د ښه راغلاست په ترڅ کې د هېواد په پرمختګ او سمسورتيا کې د هغوى رول مهم وباله.

د رئیس الوزرا اداری مرستیال زیاته کړه، امنیت د اقتصادي او سوداګریزو فعالیتونو په ګډون د ډېرو فعالیتونو بنسټ دی او که سوداګر او پانګوال ځاني او مالي امنیت ونه لري، نو د دوی لپاره به په بېلابېلو برخو کې پانګونه ستونزمنه وي، خو اسلامي امارت د امنیت د دې مسئلې په درک سره یې ټولو ښاریانو په ځانګړې توګه سوداګرو ته لومړیتوب ورکړی او د هغوی لپاره یې لازمې اسانتیاوې برابرې کړي دي.

مولوي عبدالسلام حنفي په خپله وروستۍ وینا کې وویل چې اسلامي امارت به د دوی وړاندیزونو ته پام وکړي.