اسلامي امارت په افغانستان کې د ملګرو ملتونو د امنیت شورا د ځانګړي استازي په ټاکلو خپله ناخوښي څرګنده کړه

افغان غږ خبری آژانس - کابل: د بهرنیو چارو وزارت ویاند عبدالقهار بلخی په ایکس ټولنیزه شبکه کې لیکلی، چې د امنیت شورا له غوښتنې سره سره، د ځانګړی همغږی کوونکی د دوه اړخیزې ارزونې په اړه بحث او وضاحت ته اړتیا ده.

 

هغه زیاته کړه: د افغانستان دولت یو ځل بیا ټینګار کوي چې د ملګرو ملتونو د ځانګړي ماموریت (یوناما) په موجودیت کې د افغانستان لپاره د بل اضافي استازي ګمارل غیر ضروري ګڼل کیږي، ځکه افغانستان په جګړه کې ښکیل هیواد نه دی او اوس د مرکزي حکومت حاکمیت لري. د هیواد ګټې کولی شي خپل مکلفیتونه وساتي او سرته ورسوي او د دوه اړخیزو او څو اړخیزو میکانیزمونو له لارې د مسلو اداره کولو وړتیا ولري.

 

ښاغلي بلخي ټینګار وکړ چې د افغانستان او نړۍ په معاصر تاریخ کې ځانګړي استازي نه یوازې دا چې د کومې شخړې په حل کې پاتې راغلي، بلکې د بهرنیو نسخو په تحمیلولو سره یې وضعیت لاپسې پېچلی کړی دی.

 

هغه څرګنده کړې ده: په داسې حال کې چې موږ له افغانستان سره د غښتلي او پراخ تعامل لپاره د ملګرو ملتونو د ټولو مثبتو هڅو هرکلی کوو، زموږ چلند به په نهایت کې د نه بدلیدونکي دیني عقایدو، کلتوري ارزښتونو او د افغانانو د ملي ګټو پر بنسټ وي. ملګري ملتونه دې د افغانستان په اړه په خپلو پریکړو کې شته واقعیتونه په پام کې ونیسي او د هیڅ لوري تر اغیز لاندې نه راځي.

 

د یادولو وړ ده چې د ملګرو ملتونو امنیت شورا د جمعې په ورځ ۲۷۲۱ پریکړه لیک تصویب کړ چې له مخې یې د کابل او د اسلامي امارت له مشرانو سره د اړیکو د زیاتولو په موخه د افغانستان لپاره د ځانګړي استازي د ټاکلو غوښتنه شوې وه.