د ملګرو ملتونو د امنیت شورا غونډه به نن د افغانستان د وضعیت په اړه بحث وکړي

افغان غږ خبری آژانس: یو شمیر رسنیو خبر ورکړی، چې د ملګرو ملتونو د امنیت شورا په ویب پاڼه کې د خپور شوي مهال ویش له مخې ټاکل شوې دغه غونډه نن د جمعې په ورځ د نیویارک پر وخت د سهار لس بجې جوړ شي.

 

ټاکل شوې چې په دې غونډه کې د افغانستان د وضعیت د "خپلواکې ارزونې" راپور وڅېړل شي.

 

دا راپور په افغانستان کې د ملګرو ملتونو د ځانګړي همغږي کوونکي فریدون سینیرلیوګلو له خوا چمتو شوی او د ملګرو ملتونو عمومي منشي د نومبر په اتمه امنیت شورا ته استولی دی.

 

په دغه راپور کې په افغانستان کې د یوه ټول شموله حکومت، تلپاتې سولې او ټولنیز پرمختګ پر رامنځته کولو ټینګار شوی دی.