د خوړو نړیوال پروګرام په یوه کال کې په افغانستان کې له ۱۸ میلیونو ډېرو خلکو ته خوراکي توکي وېشلي دي

افغان غږ خبری آژانس - کابل: نن پنجشنبه (قوس ۳۰مه) دغې موسسې د «ایکس» ټولنیزې شبکې یوه ویډیو خپره کړې او لیکلي یې دي چې په دې موده کې ۹،۳ میلیونه ښځې او ۱۰،۶ میلیونه ماشومان له مرستو برخمن شوي دي.

 

دغه سازمان دا هم ویلي، چې تېر کال ۱،۵ میلیونه زده کوونکو ته خواړه ورکړل شوي دي.

 

د خوړو نړيوال سازمان وايي، چې په دې موده کې يې د پياوړتيا په برخه کې شپږ زره ښځې او شل زره بزګرانو مسلکي زده کړې کړې دي.

 

دغه سازمان همدارنګه زیاته کړه چې د اقلیم د کړکیچ د اغیزو د کمولو او د خلکو د ځواکمنولو په موخه یې د هیواد په بیلابیلو سیمو کې څه باندې ۲۶۰ د اوبو کانالونه، ۳۰ کیلومتره محافظوي دیوالونه او ۲۲ زیرمې او واړه بندونه جوړ کړي دي.

 

د خوړو د نړيوال پروګرام د راپور له مخې، دغه مرستې د دغه سازمان د همکارانو په همکارۍ د افغانستان له خلکو سره شوې دي او د داسې راتلونکي د جوړولو لپاره کار کوي چې په افغانستان کې هيڅوک له لوږې نه ويده شي.

 

له بلې خوا دغه سازمان ویلي دي چې د بودیجې د کمښت له امله یې لس میلیونه کسان له خوراکي موادو څخه ایستلي دي.