مسوولینو ته ورکول شوي مسوولیت شتمني نه، بلکې امانت دی

افغان غږ خبری آژانس - کابل: د کورنیو چارو وزارت په خپل ټولنیزه پاڼه کې لیکلي چې د کورنیو چارو وزارت سرپرست سراج الدین حقاني د دغه وزارت له چارواکو سره په لیدنه کې ویلي چې پر چارواکو ور اچول شوی مسوولیت ملکیت نه بلکې امانت دی. .

د کورنیو چارو وزارت سرپرست له خلکو سره د کورنیو چارو وزارت د کارکوونکو د ښو کړنو ستاینه وکړه او ویې ویل چې تر اوسه کومه نیمګړتیا نه ده لیدل شوې، خو د چارو د لا ښه تطبیق لپاره باید هڅې وشي.

ښاغلي حقاني زیاته کړه، مسوولې ادارې دې د نویو ادارو په ګمارنه کې شفافیت ته جدي پام وکړي او چارې دې کار کوونکو ته پرېږدي.

د کورنیو چارو وزارت سرپرست له خلکو سره پر سالمې چلند ټینګار وکړ او ویې ویل، مسوولین دې ورسپارل شویو دندو ته پاملرنه وکړي او ژر تر ژره دې ترسره کړي.

ښاغلي حقاني زیاته کړه، د اسلامي امارت په نظام کې شاملېدل او د عزت ترڅنګ د خلکو خدمت کول د دنیا او آخرت د کامیابۍ سبب کېږي، که څه هم ډېرو خلکو د هېواد او خلکو په نوم سیاستونه وکړل، خو ونه توانېدل. خلکو ته صادقانه خدمت وکړي.

نوموړي مسؤلینو ته وویل، اسلام د اعتدال دین دی، نو له خلکو سره په چلند کې د سختۍ پر ځای نرمي وکړئ، ټول کارکوونکي باید خپل کردار او مخ په اسلامي اخلاقو سمبال کړي او مسؤلیت ته د مالکیت په سترګه نه، بلکې د امانت په سترګه وګوري.