پاکستان د یوه ځانګړي میکانیزم له مخې د افغان سوداګرو کانټینرونه خوشې کوي

افغان غږ خبری آژانس – کابل: د پاکستان له خوا د کراچۍ په بندر کې د کانتینرونو د بندیدو په اړه د افغانستان او پاکستان د سوداګرۍ د ګډې خونې د چارواکو له څرګندونو وروسته؛ د صنایعو او سوداګرۍ وزارت ویاند ټینګار وکړ چې دغه کانتینرونه د یوه مشخص میکانیزم له مخې خوشې کېږي او افغانستان ته رسېږي.

 

د افغانستان د صنایعو او سوداګرۍ وزارت ویاند عبدالسلام اخندزاده جواد د چهارشنبې په ورځ (قوس ۱) د افغان غږ خبری آژانس خبریال ته وویل چې بند شوي کانټینرونه به په راتلونکو ورځو کې په منظم ډول افغانستان ته داخل شي.

 

هغه زیاته کړه چې د دغه هېواد د بهرنیو چارو او سوداګرۍ وزیر په ګډون پاکستاني چارواکو د اسلامي امارت د صنعت او سوداګرۍ له سرپرست وزیر سره په کتنه کې؛ دوی ژمنه کړې چې ډېر ژر به دغه کانتینرونه خوشې کړي.

 

جواد په دې اړه وویل چې پاکستاني چارواکو ویلي چې دغه کانټینرونه به له کړنلارې او د یوه ځانګړي میکانیزم له پلي کېدو وروسته افغانستان ته ولېږدول شي.

 

خو د افغانستان او پاکستان د سوداګرۍ د ګډې خونې اجراییه رییس وايي، د پاکستاني چارواکو له ژمنو سره سره د افغان سوداګرو درې زره کانټینرونه د کراچۍ په بندر کې نه دي خوشې شوي.

 

نقيب الله صافي وويل، تر اوسه له کراچۍ څخه کوم کانټينر نه دى خلاص شوى او د پاکستان حکومت د کراچۍ بندر چارواکو ته د انتظار کولو امر کړى دى.

 

دا په داسې حال کې ده، چې څو مياشتې وړاندې پاکستان اعلان وکړ، چې د دغه هېواد له بندرونو څخه سوداګريز مالونه له ماليې پرته افغانستان ته داخلېدل او بيا په قاچاقي ډول د افغانستان په مليونونو ډالره مالياتي عوايد له لاسه ورکوي.

 

وروسته له هغه چې دغه هېواد د کراچۍ په بندر کې د افغان سوداګرو د سوداګریزو مالونو څه باندې درې زره کانټینرونه ودرول، چې د افغانستان او پاکستان اړیکې یې د پخوا په پرتله ډېرې کړکېچنې کړې.

 

د اسلامي امارت چارواکي په داسې حال کې ټینګار کوي چې د پاکستان حکومت د لا زیاتو مالیاتو غوښتنه کوي او دې کار افغان سوداګرو ته میلیونونه ډالره زیان اړولی دی.

 

په همدې حال کې د سوداګرۍ او پانګونې خونې مشر محمد یونس مومند وايي، د پاکستان له خوا د بندیزونو له لګولو وروسته له څو میاشتو راهیسې د افغان سوداګرو د مالونو ۳۳۸۰ کانټینرونه په کراچۍ کې بند پاتې دي.

 

د مومند په وينا، د دې ترانزيټي شتمنۍ ارزښت دوه ميليارده ډالره دى او هره ورځ د پاکستان د حکومت له خوا په سلګونو زره ډالره د کثافاتو پيسې ور اضافه کېږي.

 

هغه وویل، «افغان سوداګرو پرېکړه کړې چې په راتلونکي کې د کراچۍ له بندر نه ګټه واخلي، تر څو چې منظم نړیوال تضمین موجود نه وي،»

 

په دغو سوداګريزو توکو کې د موټر پرزې، تور چای، ټايرونه، ټوټې، سګريټ، چينجي، زيورات او ځينې نور توکي شامل دي.

 

د سوداګرۍ او پانګونې خونې غړي خانجان الکوزي هم د افغان غږ خبری آژانس خبریال ته وویل چې پاکستان په ځلونو له افغانانو سره د خپلو تړونونو خلاف چلند کړی دی.

 

هغه چې د افغانستان او پاکستان د پانګونې د ګډې خونې غړی هم دی، هیله څرګنده کړه چې دا ځل به د اسلامي امارت چارواکي له پاکستاني چارواکو سره لیکلي هوکړه لیک ترلاسه کړي او ستونزه به دایمي حل کړي.

 

د يادونې ده، چې په تېرو مياشتو کې د افغانستان او پاکستان اړيکې په بې ساري ډول ترينګلې شوې دي. سرحدي شخړې، د کراچۍ په بندر کې د سوداګرو د مالونو د لېږد رالېږد بندېدل او له دغه هېواده د افغان کډوالو ایستل هغه کړنې دي چې د دواړو هېوادونو پر اړیکو یې سیوري اچولې دي.