تېر کال په هېواد کې څه باندې ۱۷ زره کسان د شکرې په ناروغۍ اخته شوي وو

افغان غږ خبری آژانس - کابل: د عامې روغتیا وزارت معین حبیب الله اخندزاده په کابل کې د شکرې ناروغۍ د نړیوالې ورځې په مناسبت جوړې شوې غونډې ته د وینا پر مهال وویل چې د شمېرو له مخې به تر ۲۰۲۲ کال پورې څه باندې ۱۷ زره کسان د شکرې په ناروغۍ اخته شوي.

 

ښاغلي اخندزاده وویل: "په ۲۰۲۲ کال کې به ۱۷۴۹۹ کسان د شکرې په ناروغۍ اخته شي او د ناروغانو شمېر مخ په زیاتېدو دی."

 

د اخندزاده په وينا، د هېواد ټول روغتيايي مرکزونه د شکرې ناروغۍ د تشخيص او درملنې وړتيا لري.

 

هغه زياته کړه، چې د پوهاوي په برخه کې لا زياتې هڅې روانې دي.

 

له بلې خوا د روغتيا د نړيوال سازمان استازي نعيم الله صافي په دې غونډه کې وويل چې دغه سازمان د شکرې ناروغۍ پر وړاندې د مبارزې په برخه کې له عامې روغتيا وزارت سره همکاري کوي.

 

ښاغلي صافي وویل: لکه څنګه چې موږ د عامې روغتیا له وزارت سره په نورو برخو کې همکاري کوو، د شکرې ناروغۍ پر وړاندې د مبارزې لپاره د خدمتونو د وړاندې کولو او کنټرول په برخه کې له دغه وزارت سره څومره همکاري کوو.

 

په دې غونډه کې ګډونوالو دا هم وویل، چې د شکرې ناروغۍ د مخنیوي لپاره باید خلک خبر شي او نړیوال سازمانونه باید د هېواد له روغتیايي سیستم ملاتړ وکړي.

 

د عامې روغتیا په وزارت کې د مخنیوي درملو رئیس حیدر خان حیدر وویل: "که موږ همکاري ونه کړو، یو کس به ونه شي کولای چې دغه ناروغۍ کنټرول کړي."

 

د ډاکټرانو په وینا چاقۍ، د خوړو غیر متوازن مصرف، د تنباکو استعمال او د فزیکي فعالیت نشتوالی د شکرې ناروغۍ اصلي لاملونه دي.