د هېواد په څلورو ولايتونو کې يو شمېر پرمختيايي پروژې بشپړې شوې

افغان غږ خبری آژانس – کابل: د اسلامی امارت د کلیو پراختیا او بیارغونې ریاست په غزنی کې خبر ورکړی، چې د کلیو پراختیایی ادارې (CDDO) د سیمه ییزو ارګانونو په همکارۍ د یوشمیر کلیو د پراختیایی پروژو کار بشپړ شوی دی.

 

د دغه رياست د خبرپاڼې له مخې، په دغو پروژو کې د استنادي دېوالونو، پلچکونو، د سړکونو پخول او د اوبو لګولو د کانالونو پاکول شامل دي.

 

د معلوماتو له مخې، دغه پروژې د ١٦ ميليونه افغانيو په ارزښت د "CDDO" موسسې په مالي مرسته پلې شوې دي.

 

په همدې حال کې د اسلامي امارت د هرات ولایت د کلیو پراختیا او بیارغونې ریاست وايي، چې د دغه ولایت په کهسان ولسوالۍ کې ۱۶۰۰ مسلکي او غیر مسلکي کارکوونکو ته د ۱۱ زره ۱۵۰ ورځو د کار په بدل کې ۵ میلیونه ۴۳ زره ۲۵۰ افغانۍ نغدي معاش ورکول کېږي.

 

دغه پيسې د ملګرو ملتونو د مشورتي دفتر او د بشري مرستو د ادارې (CHA) له خوا د سړکونو د پاکولو او جغل اچولو، د کانالونو او ويالو پاکولو، پلچکونو او استنادي دېوالونو د جوړولو لپاره ورکړل شوې دي.

 

په ورته وخت کې په بادغیس کې د اسلامي امارت مطبوعاتي دفتر په دغه ولایت کې پر ۳۰۲ کارکوونکو د ۱۱۲۵۹۵۰ افغانیو نغدي ویشلو خبر ورکړی دی.

 

دغه پيسې هغو کارکوونکو ته ورکړل شوې، چې د "اراوپي" موسسې له خوا د دغه ولايت په بالامرغاب او جوند ولسواليو کې د ويجاړ شويو شنو خونو د بيارغونې لپاره استخدام شوي وو.

 

د دغه دفتر د معلوماتو له مخې، په يادو دوو ولسواليو کې د ٢٤ شنو خونو خاوندانو ته کيمياوي سرې، معياري پلاستيک، اصلاح شوې هګۍ او ترماميترونه وېشل شوي دي.

 

خو د افغانستان د راتلونکي نسل انسټیټیوټ (FGA) ویلي چې د نیمروز په چخانسور ولسوالۍ کې د اوبو لګولو د یوه کانال د پاکولو لپاره ۳۱۰ تنه کارګران په ۲۰ ورځو کې استخدام شوي او هر کارګر ته د ورځې پنځه امریکايي ډالره معاش ورکول کېږي.