هغه کسان چې د وطن د ازادۍ لپاره یې مبارزه کړې، اخلاق او اخلاص یې باید تر نورو ښه وي

افغان غږ خبری آژانس - کابل: د کورنیو چارو وزارت سرپرست سراج الدین حقاني د پولیسو د اکاډمۍ له روزنتونونو څخه د لیدنې د سیمینار په پای کې د پولیسو ځواکونو ته په خطاب کې وویل چې جهاد د هېواد د ازادۍ او خپلواکۍ لپاره و. هوساینه او باید د وظیفې بدیل ونه ګڼل شي، او ستاسو اخلاق او اخلاص باید د نورو څخه غوره وي.
 
د کورنیو چارو وزارت سرپرست د تېر جهاد قربانیو ته په اشارې سره زیاته کړه، چې د تېر جهاد په جریان کې د افغانانو وینه که راټوله شي، د غوشتې د کانال د اوبو په څېر بهېږي.
 
  هغه امنیتي ځواکونو ته په خطاب کې وویل: زموږ خدمت به هغه وخت بشپړ شي چې زموږ د ذوق پر ځای اسلامي او افغاني فکر په موږ غالب شي او موږ ترې ګټه واخلو.
 
  ښاغلي حقاني پر سرتېرو ټینګار کړی، چې د مشرانو د حکمونو په پلي کولو کې دې ښه اخلاق په پام کې ونیسي.
 
  د کورنیو چارو وزارت سرپرست له پولیسو وغوښتل چې له بشپړې روزنې وروسته دې مسوولیت په غاړه واخلي.
 
د کورنیو چارو وزارت سرپرست همداراز زیاته کړه، چې په علمي بنسټونو کې کار کول زما له سترو ارمانونو څخه وو، چې له نېکه مرغه هغه ورځ راغله او اوس د هېواد د ځوانانو د پوهاوي په موخه په منظم ډول کار کوي.
 
د ښاغلي حقاني په وینا، که پولیس د خپلو وړتیاوو او شمېر له مخې پر ځان بسیا شي، هېڅوک نه شي کولای د نظام او خلکو ترمنځ واټن رامنځته کړي.
 
په همدې حال کې د دغه وزارت د اداري مرستيال محمد طاهر د پوليسو د اوسني نصاب په اړه وويل: د پوليسو د اکاډمۍ په اوسني نصاب کې د انګريزي کلمو پر ځاى د ملي ژبو اصطلاحات ځاى پر ځاى شوي دي. په دغه نصاب کې لا هم مثبت بدلونونه شته چې د پولیسو د تعلیم په موخه یې په پوره قوت سره بشپړ کړي.
 
دغه راز دکورنيو چارو وزارت اداري معين مولوي نورجلال جلالي دکورم دپوره کولو په برخه کې د مسوولينو هلې ځلې وستايلې او ويې ويل چې په نوي نصاب کې اغيزمن بدلونونه راغلي دي .